ԵՐԵՎԱՆ, 26 հունիսի – Sputnik. Կարեն Դեմիրճյանի անվան մարզահամերգային համալիրի տարածքում հրդեհ է բռնկվել։ Տեղեկությունը Sputnik Արմենիայի հետ զրույցում հաստատեց ԱԻՆ Տեղեկատվության և հասարակայնության հետ կապերի վարչության պետ Էդմոն Զարգարյանը։
«Ահազանգով մարզահամերգային համալիրի տարածք են մեկնել 10 մարտական հաշվարկ, այս պահին տեղում աշխատում են և փորձում հրդեհը մարել։ Հրդեհի տարածվածությունն այս պահին գնահատել չենք կարող, չափումները կկատարվեն մարումից հետո»,-ասաց Զարգարյանը։
Հրդեհի մասին լուրն արդեն տարածվել է սոցցանցերում։ Oգտատերերից մեկը հրապարակել է այս տեսանյութը։
Նշենք, որ հրդեհի մասին Facebook-ի իր էջում գրել է նաև Երևանի քաղաքապետի մամուլի խոսնակ Հակոբ Կարապետյանը։
«Ծիծեռնակաբերդում հենց հիմա խոշոր հրդեհ է: Իհարկե, հետաքննությունը պատճառները կպարզի, ուղղակի ֆիքսենք, որ մոտ կես ժամ առաջ էդ հատվածում ահավոր մեծ հրավառություն էր»,-նշել է նա:
Կարապետյանի խոսքով՝ ռեստորանային հրավառությունները լուրջ խնդիր են Երևան քաղաքի համար։
Նրա գրառման մեկնաբանություններում ֆեյսբուքյան օգտատերերից մեկը լուսանկար է հրապարակել Մարզահամերգային համալիրի տարածքի հրդեհից։
Հիշեցնենք, որ նախորդ տարի, հունիսի 15-ին, կրկին հրդեհ էր բռնկվել այդ տարածքում։
Հրդեհ` Ծիծեռնակաբերդի մոտակայքում. դեպքի վայր է մեկնել 6 մարտական հաշվարկ. տեսանյութ