ԵՐԵՎԱՆ, 26 հունիսի – Sputnik. ՀՀ վարչապետ Նիկոլ Փաշինյանը Facebook–ի իր էջում ազդարարել է, որ այս պահից սկսած Հրայր Թովմասյանը ՍԴ նախագահ չէ, քանի որ Սահմանադրական փոփոխությունները մտան ուժի մեջ։
«Այս պահից սկսած Հրայր Թովմասյանը ՍԴ նախագահ չէ, իսկ Ֆելիքս Թոխյանը, Հրանտ Նազարյանը և Ալվինա Գյուլումյանը ՍԴ անդամ կամ դատավոր չեն։ Երկու ամսվա ընթացքում պետք է ընտրվեն ՍԴ երեք նոր դատավորներ»,–գրել է նա։
Վարչապետը տեղեկացրել է, որ Հայաստանի բոլոր պետական մարմինները պարտավոր են ի գիտություն ընդունել այս իրողությունը և առաջնորդվել ըստ այդմ։
Հավելենք, որ Արդարադատության նախկին նախարար Արփինե Հովհաննիսյանը Facebook–ի իր էջում ուժի մեջ մտնող սահմանադրական փոփոխություններն ապօրինի է անվանել և նշել, որ դատավորների լիազորությունները չեն դադարում։ «Դրա համար «Սահմանադրական դատարանի մասին» օրենքում փոփոխություն պիտի անեք»,–գրել է նա։
Հիշեցնենք՝ Ազգային ժողովը հունիսի 22-ին կայացած արտահերթ նիստում ընդունեց «Իմ քայլը» խմբակցության հեղինակած նախագիծը, որով Սահմանադրական դատարանի գործող նախագահը պաշտոնանկ է արվում ու շարունակում աշխատել որպես ՍԴ անդամ, իսկ ՍԴ երեք անդամները, որոնք այդ պաշտոնում աշխատել են 12 տարուց ավելի, ուղարկվում են թոշակի:
Սա նշանակում է, որ Հրայր Թովմասյանը, որի պաշտոնավարման 12 տարին չի լրացել, կազատվի ՍԴ նախագահի պաշտոնից, բայց կշարունակի աշխատել որպես ՍԴ դատավոր: Իսկ ՍԴ երեք անդամները՝ Ալվինա Գյուլումյանը, Ֆելիքս Թոխյանն ու Հրանտ Նազարյանը, որոնք ավելի քան 12 տարի աշխատել են ՍԴ դատավորի պաշտոնում, կգնան թոշակի:
Ռուստամ Բադասյանը պատասխանել է ՍԴ 4 դատավորների` պաշտոնից ազատվելու մասին հայտարարությանը
Ազգային ժողովի նախագահ Արարատ Միրզոյանն այսօր Facebook–ի իր էջում գրել էր, որ Սահմանադրության մեջ կատարված փոփոխությունները վաղվանից ուժի մեջ կմտնեն։
Նշենք, որ հունիսի 25–ին ԱԺ «Բարգավաճ Հայաստան» խմբակցությունը դիմել է Սահմանադրական դատարան՝ վիճարկելով ԱԺ ընդունած սահամանադրական փոփոխությոունների մասին նախագիծը։