ԵՐԵՎԱՆ, 24 հունիսի – Sputnik. «Իմ քայլը» խմբակցությունում կորոնավիրուսով վարակված անձինք կան, սակայն խորհրդարանական աշխատանքները դրանից չեն խոչընդոտվելու։ Լրագրողների հետ զրույցում նման կարծիք հայտնեց խմբակցության ղեկավար Լիլիթ Մակունցը։
«Որևէ մեկի մոտ ախտանշաններ չեն եղել։ Ես գիտեմ, որ խմբակցությունից մեկի մոտ թեստի պատասխանը դրական է եղել, իսկ մյուսների պատասխանը չի եկել։ Մենք կանենք առավելագույնը, որ դա ԱԺ աշխատանքներին չխանգարի»,–ասաց Մակունցը։
Հարցին, թե խմբակցության բոլոր անդամները կթեստավորվե՞ն, Մակունցը պատասխանեց` ոչ։ Նրա խոսքով` թեստեր հանձնում են նրանք, ում մոտ կա՛մ ախտանշաններ կան, կա՛մ հնարավոր կոնտակտավոր են։
Լրագրողների դիտարկմանը, թե ԱԺ փոխնախագահ Վահե Էնֆիաջյանի մոտ կորոնավիրուս է հայտնաբերվել, որը շփվել է ԱԺ նախագահ Արարատ Միրզոյանի հետ, արդյո՞ք վերջինս գոնե չի թեստավորվի` Մակունցը պատասխանեց, որ լրագրողները նույնպես շփվել են Էնֆիաջյանի հետ, և եթե այդպես նայեն հարցին, ուրեմն բոլորը պետք է թեստավորվեն։ Նա հավելեց` բժիշկների հետ խորհրդակցության արդյունքում որոշումներ կկայացվեն թեստավորման մասով։
Հիշեցնենք` այսօր հայտնի դարձավ, որ ԱԺ «Իմ քայլը» խմբակցության պատգամավոր Վիկտոր Ենգիբարյանի, ինչպես նաև Քրիստինե Պողոսյանի մոտ կորոնավիրուս է ախտորոշվել:
Հայաստանում կորանավիրուսով վարակվածների թիվն արդեն հասել է 21 717–ի։