ՀՀ ԱՆ Հիվանդությունների վերահսկման և կանխարգելման ազգային կենտրոնի ներհիվանդանոցային վարակների կանխարգելման բաժնի պետ Ռոմելլա Աբովյանի խոսքով` կտորե դիմակ անհրաժեշտ է կրել այն դեպքում, երբ բժշկական դիմակ գնելու հնարավորություն չկա։
«Բժշկական դիմակներն արտադրամասում են կարվում, և կա հստակ ցուցում`ինչ շերտերից, ինչ նյութերից պետք է դրանք պատրաստել։ Դրանք նաև փորձաքննություն են անցնում` ճշտելու, թե արդյո՞ք ապահովում է օդափոխանակությունը, կամ էլ ունի՞ ֆիլտր, որը կպաշտպանի վիրուսի ներթափանցումից»,– Sputnik Արմենիայի հետ զրույցում ասաց Աբովյանը։
Առողջապահության համաշխարհային կազմակերպությունը, ըստ Աբովյանի, ևս առաջարկում է բժշկական դիմակ չլինելու պարագայում տնային պայմաններում պատրաստված դիմակներ կրել, սակայն դրանք նույնպես պետք է կարվեն որոշակի պահանջներին համապատասխան։ Մասնագետի խոսքով՝ տանը պատրաստված դիմակների դեպքում մարդկային գործոնը կա, այսինքն` եթե ինչ–որ կանոն չպահպանվի, կարող է դիմակն անպիտան դառնալ։
Անդրադառնալով կտորե դիմակներ կրելու միջազգային փորձին` Աբովյանը նշեց, որ խնդիրը դիմակների սղությունն էր, իսկ բժիշկները բժշկական դիմակների կարիք ավելի շատ ունեին։
Դիմակ բաժանող նախարարների օրինակը վարակիչ է դարձել․ հայտնի է՝ ում միտքն էր ակցիան
Ինչ վերաբերում է ռեսպերատորով դիմակներին, ապա ըստ մասնագետի` հանրության շրջանում դրանք կրելու իմաստ չկա։ Այդ դիմակները նախատեսված են ախտանշաններով պացիենտի հետ շփման ժամանակ կրելու համար, ինչպես նաև կարող են օգտագործել նրանք, ովքեր խնամում են կորոնավիրուսով վարակված տան անդամին։
Հարցին, թե ո՞ւմ է հակացուցված դիմակ կրել` Աբովյանը պատասխանեց, որ դրանք պետք է այնպես պատրաստված լինեն, որ բոլորի համար էլ անվտանգ լինեն` նույնիսկ ալերգիկների, սրտանոթային հիվանդների։
Հիշեցնենք, որ երեկ գրեթե բոլոր նախարարները, ոստիկանապետը, ՊԵԿ նախագահը, մարզպետները փողոցներում դիմակ էին բաժանում: Վարչապետ Նիկոլ Փաշինյանը նույնպես պարբերաբար դիմակներ է բաժանում փողոցներում` հորդորելով անպայմանորեն դիմակ կրել։
«Խնդրում եմ` դիմակը վերցրեք ու դրեք»․ նախարարներն ու մարզպետները դուրս են եկել ֆլեշմոբի