ԵՐԵՎԱՆ, 22 հունիսի –Sputnik. Էստոնիայի իշխանությունները չեն լսել եվրոպական տարբեր կառույցների խորհուրդները և չեն փոխել իրենց դիրքորոշումը Sputnik Էստոնիայի նկատմամբ, որը ստիպված իր գործունեությունը սահմանափակել է` հասցնելով նվազագույնի։ Այս մասին Sputnik Էստոնիայի ղեկավար Ելենա Չերիշևան ասել է մարդու իրավունքների գծով ԵԱՀԿ առցանց խորհրդակցության մասնակիցներին։
Նա նշել է, որ Էստոնիայում խոսքի ազատության սկզբունքների ակնհայտ խախտումներ են նկատվում։ Մասնավորապես, ըստ Չերիշևայի, Էստոնիայի իշխանությունները ճնշման բացահայտ ձևեր և գործիքներ են կիրառում Sputnik Էստոնիայի խմբագրության նկատմամբ։ 2019 թվականի վերջին Էստոնիայի ոստիկանության և սահմանային անվտանգության դեպարտամենտը լրատվամիջոցի բոլոր աշխատակիցներին վերջնագրերով նամակներ էր ուղարկել` եթե լրագրողները չդադարեցնեն համագործակցել ռուսական գործակալության հետ, նրանց նկատմամբ քրեական գործեր կհարուցվեն «Եվրոպական պատժամիջոցներին չհետևելու» հոդվածով։ Պատժամիջոցներ ասելով երկրի իշխանությունները հասկանում են այն սահմանափակումները, որոնք կիրառվել են 2014 թվականին «Ռոսիա սեգոդնյա» ՄՏԳ-ի գլխավոր տնօրեն Դմիտրի Կիսելյովի դեմ։ Ընդ որում, գործակալությունը որևէ պատժամիջոցային ցանկում չկա։
Այնուամենայնիվ, սպառնալիքների ֆոնին 2020 թվականի հունվարի 1-ից գործակալության կայքն աշխատում է արտակարգ ռեժիմով, իսկ խմբագրության շատ աշխատակիցներ ստիպված են եղել խզել պայմանագրերը Sputnik Էստոնիայի հետ։
«Սա այլակարծության դեմ պայքարի ամենավառ օրինակն է։ Միայն Էստոնիայի ոստիկաններն են իրենց թույլ տալիս անհատական պատժամիջոցներ կիրառել ռուսական պետական ԶԼՄ–ի աշխատակիցների վրա», – հայտարարել է Չերիշևան։
Նա նաև հիշեցրել է, որ անցած տարվա դեկտեմբերի վերջին Sputnik Էստոնիայի լրագրողների դեմ ծավալված արշավի ֆոնին Էստոնիայի վարչապետ Յուրի Ռատասը էստոնական ժողովրդավարությունն ամբողջ աշխարհի համար օրինակ էր անվանել։
ՌԴ ԱԳՆ–ն պահանջում է դադարեցնել Sputnik Էստոնիայի նկատմամբ ռեպրեսիվ քաղաքականությունը
«Փաստորեն, նա ոստիկանության կողմից լրագրողներին սպառնալը ժողովրդավարություն է համարում։ Իսկ անցանկալի ԶԼՄ–ների նկատմամբ ակնհայտ բռնաճնշումները խոսքի ազատություն է էստոնական ձևով», – ԵԱՀԿ կոնֆերանսի ժամանակ իր ելույթում ընդգծել է Չերիշևան։
Հիշեցնենք, որ ԶԼՄ–ների ազատության հարցերով ԵԱՀԿ ներկայացուցիչ Արլեմ Դեզիրը ի սկզբանե կտրականապես դեմ էր Էստոնիայի դիրքորոշմանը։ 2019 թվականի դեկտեմբերին նա դիմել էր Էստոնիայի իշխանություններին` կոչ անելով զերծ մնալ Sputnik Էստոնիայի վրա ճնշումներ գործադրելուց և խմբագրության աշխատանքի սահմանափակումներն ավելորդ անվանելով։ «Ափսոս, որ ձեր ձայնը լսելի չդարձավ», – իր ելույթի վերջում Դեզիրին է դիմել Չերիշևան։
Կատարյալ անօրինականություն. եվրոպացիներին պատմել են Sputnik Էստոնիայի մասին
Մարդու իրավունքների հարցերով ԵԱՀԿ խորհրդակցությունը (HDIM) Եվրոպայում ամեն տարի անցկացվող խոշորագույն համաժողով է, որին մասնակցում են ԵԱՀԿ 57 երկրների պատվիրակություններ, ԵԱՀԿ կառույցների ներկայացուցիչներ, ինչպես նաև միջազգային և հասարակական կազմակերպությունների անդամներ։ Համաժողովի մասնակիցները քննարկում են ԶԼՄ–ների ազատությանը, ժողովրդավարությանը և ամբողջ աշխարհում լրագրողների անվտանգության խնդիրներին առնչվող հարցեր։ Համաժողովի արդյունքում մասնակիցները խորհուրդներ են տալիս առավել արդիական խնդիրների լուծման համար։
Այս տարի համաժողովն անցկացվում է Ալբանիայի նախագահությամբ` կորոնավիրուսի համավարակի հետ կապված առցանց ձևաչափով։