ԵՐԵՎԱՆ, 23 հունիսի — Sputnik. ՀՀ գործող Սահմանադրությամբ սահմանադրական փոփոխությունները ենթակա են նախնական սահմանադրական վերահսկողության: Այսօր լրագրողների հետ ճեպազրույցում, մեկնաբանելով երեկ ԱԺ արտահերթ նիստում ընդունված ՍԴ որոշ դատավորների պաշտոնանկությանը վերաբերող նախագիծը, նման արձանագրում արեց ՀՀ ՍԴ նախագահ Հրայր Թովմասյանը, ապա ավելացրեց՝ ՍԴ-ն ԱԺ-ից նման նախագիծ չի ստացել ու չի քննարկել:
«Այն Սահմանադրությունը, որը գործում է ու որի ստեղծմանը ես մասնակցել եմ, այնտեղ չի գրված, որ, եթե սահմանադրական փոփոխությունները վերաբերում են ՍԴ-ին, դա ենթակա չէ նախնական սահմանադրական վերահսկողության»,- ասաց նա:
Հարցին, թե սահմանադրության փոփոխությունների պարագայում ի՞նչ է պատրաստվում անել ՍԴ-ն, Հրայր Թովմասյանը նշեց, որ առ ոչինչ իրավական ակտերին մարդը չպիտի ենթարկվի: Նա հայտարարեց, որ անկախ ամեն ինչից, ինքը շարունակելու է գնալ աշխատանքի:
«Ինչ վերաբերում է քաղաքական գնահատականներին, ապա մեծ զսպվածություն ցուցաբերելով, պիտի ընդամենը ասեմ՝ որպես իրավաբան, որպես մեր Սահմանադրության հեղինակներից մեկը ես երեկ մեր ԱԺ-ում տեղի ունեցածի համար ամոթի զգացողություն ունեցա»,- ասաց Թովմասյանը:
Հիշեցնենք՝ ՀՀ Ազգային ժողովը հունիսի 22-ին կայացած արտահերթ նիստում ընդունեց «Իմ քայլը» խմբակցության հեղինակած Սահմանադրության փոփոխությունները, որով Սահմանադրական դատարանի գործող նախագահը պաշտոնանկ է արվում ու շարունակում աշխատել որպես ՍԴ անդամ, իսկ ՍԴ երեք անդամներ, ովքեր այդ պաշտոնում աշխատել են 12 տարուց ավելի, ուղարկվում են թոշակի:
Իշխանության յուրացո՞ւմ, թե՞ խորհրդարանական ժողովրդավարություն. ԱԺ-ի որոշման գնահատականները
Խորհրդարանը երեկ ընդունեց նաև «ԱԺ կանոնակարգ» օրենքում առաջարկվող փոփոխությունը, որով Սահմանադրական փոփոխությունները ՀՀ նախագահի կողմից չպիտի ստորագրվեն: ՀՀ նախագահը կստորագրի միայն «ԱԺ կանոնակարգի» այս փոփոխությունը, որից հետո այն ուժի մեջ կմտնի, և ԱԺ նախագահը կհրապարակի Սահմանադրական փոփոխությունների փաթեթը: Այդ պահից ՍԴ նախագահը պաշտոնանկ կհամարվի, իսկ ՍԴ երեք դատավորների լիազորությունները կդադարեն: