ԵՐԵՎԱՆ, 22 հունիսի - Sputnik. Հոսպիտալացման համար տանը սպասող քաղաքացի այլևս չկա: Տեղեկությունը պարետատան նիստից հետո ճեպազրույցի ժամանակ հայտնեց ՀՀ առողջապահության նախարար Արսեն Թորոսյանը։
«Երեկ Չինաստանից 3 մեծ թթվածին արտադրող կայաններ ենք ստացել, որոնք մեծացրել են մեր բժշկական կենտրոնների կենտրոնացված թթվածին արտադրելու հզորությունները։ Հենց օդանավակայանից դրանք բաշխվել են կորոնավիրուսի բուժմամբ զբաղվող ԲԿ–ներին ու արդեն իսկ որևէ հիվանդ չկա, որը տանը սպասում է հոսպիտալացման։ Այդ խնդիրը լուծվել է»,–ասաց Թորոսյանը։
Նրա խոսքով` նախարարության հաջորդ խնդիրը կորոնավիրուսով հիվանդներին տարբեր ԲԿ–ներից կորոնավիրուսային բուժմամբ զբաղվող հիվանդանոցներ տեղափոխելու հարցն է։
Նախարարը հայտնեց նաև, որ առաջիկա օրերին մի շարք ԲԿ–ներ կմիանան կորոնավիրուսով բուժմամբ զբաղվող ԲԿ–ներին։ Մասնավորապես, վաղը «Դիլիջանի», իսկ դրա հաջորդ օրը «Արմենիա» ԲԿ–ն 50 և 8 վերակենդանացման մահճակալներով կմիանա կորոնավիրուսի դեմ պայքարող ԲԿ–ներին։ Բացի այդ, առաջիկայում Սպիտակի ԲԿ–ն և Մարտունու ԲԿ–ի 50 տոկոսը կվերակազմավորվի որպես կորոնավիրուսի բուժմամբ զբաղվող ԲԿ։
Ո՞ր լաբորատորիաներում են թեստավորում իրականացնում. նախարարությունը ցանկ է հրապարակել
Թորոսյանը հայտնեց` սա աննախադեպ մոբիլիզացիա է առողջապահության ոլորտում։
Խոսելով կորոնավիրուսի հետևանքով ծանր կամ ծայրահեղ ծանր վիճակում գտնվողների մասին` առողջապահության նախարարը հայտնեց, որ այս պահի դրությամբ 627 պացիենտ է ծանր վիճակում, որից 504–ը` ծանր, 123–ը` ծայրահեղ ծանր, իսկ 44–ը` թոքերի արհեստական օդափոխման սարքին են միացված։
Հիշեցնենք, որ կորոնավիրուսով վարակվածների թիվը վերջին մեկ օրում ավելացել է 320–ով և հասել 20 588-ի։