ԵՐԵՎԱՆ, 22 հունիսի – Sputnik. Կորոնավիրուսով 100 նոր վարակվածներից 15-ը հայտնվում է հիվանդանոցում, որոնցից 5-ը՝ վերակենդանացման բաժանմունքում, իսկ 2-ը մահանում է: Տեղեկությունը պարետատան նիստից հետո ճեպազրույցի ընթացքում ասաց Հայաստանում գտնվող Ֆրանսիայի բժշկական թիմի ղեկավար Ալեքսանդր Մինյոնը։
Տխուր վիճակագրությանը զուգահեռ, Մինյոնը մեկ ուրախալի լուր էլ հայտնեց. նրա խոսքով՝ Հայաստանում կորոնավիրուսով վարակված հիվանդներից մի մասի բուժման նպատակով դեքսամետազոն են օգտագործում, այն օգնում է բուժման գործընթացում:
Ո՞ր լաբորատորիաներում են թեստավորում իրականացնում. նախարարությունը ցանկ է հրապարակել
«Այս հիվանդությունը երկար ամիսների պատմություն ունի և այնպես չէ, որ այս դեղամիջոցն անպայման, անմիջապես օգնելու է ու մեզ ազատելու է այս պատուհասից», - ասաց Ֆրանսիայի բժշկական թիմի ղեկավարը։
Վարչապետ Նիկոլ Փաշինյանն էլ նկատեց, որ դեղամիջոցը համավարակի տարածման առաջին օրերից Հայաստանում կիրառվել է:
«Դա բավականին մատչելի դեղամիջոց է, նախարարը հենց առաջին օրից կիրառվել է, բայց դա կիրառելու որոշումը հիմնականում բժշկի որոշման որոշման շրջանակում է տեղի ունեցել: Բայց քանի որ դրա հետ կապված հիմա ավելի շատ արձագանքներ կան, ենթադրվում է, որ մեր երկրում նույնպես այդ դեղամիջոցի օգտագործման ծավալները կընդլայնվեն»,- ասաց Փաշինյանը՝ հավելելով, որ դեղամիջոցը հորմոնալ է, և այն կարելի է կիրառել միայն բժշկի ցուցումով:
Հոսպիտալացման համար տանը սպասող քաղաքացի այս պահին չկա. Թորոսյանը նոր տվյալներ հայտնեց
Կորոնավիրուսով վարակվածների թիվը վերջին մեկ օրում ավելացել է 320–ով և հասել 20 588-ի։
Հիշեցնենք՝ Ֆրանսիան առաջին երկիրն է, որ բժիշկների խումբ ուղարկեց Հայաստան։ Յոթ հոգուց կազմված թիմն արդեն մոտ մեկ շաբաթ է՝ Հայաստանում է։
Ֆրանսիացի մասնագետները գործունեություն են ծավալում երեք հիվանդանոցներում՝ «Սուրբ Գրիգոր Լուսավորիչ» բժշկական կենտրոնում, Վնասվածքաբանության և օրթոպեդիայի գիտական կենտրոնում և «Սուրբ Աստվածամայր» ԲԿ ինֆեկցիոն մասնաճյուղում։
Երեք օր առաջ Հայաստան ժամանեցին նաև լիտվացի բժիշկները։ Ռուսաստանից ժամանած ավելի քան 50 բժիշկները ևս հայաստանցի գործընկերներին օգնում են կորոնավիրուսի դեմ պայքարում: Մարդասիրական օգնություն է ուղարկվել նաև Լեհաստանից և Սերբիայից։
Ավելի վաղ Առողջապահության նախարարությունը դիմել էր Արտաքին գործերի նախարարությանը ՝ դիվանագիտական կորպուսի հետ քննարկելու Հայաստանին աջակցություն ցուցաբերելու հնարավորությունը, այդ թվում ՝ կորոնավիրուսի դեմ պայքարում: Լիտվան և Վրաստանն արդեն հայտնել են Հայաստան բժիշկներ ուղարկելու իրենց մտադրության մասին: Դրանից առաջ Չինաստանը և Ռուսաստանն են օգնություն ցուցաբերել Հայաստանին ՝ դեղորայքային և օդափոխման սարքերի տեսքով: Բացի այդ, ապրիլի 7-ից Ռուսաստանի նորագույն ախտորոշման լաբորատորիան թեստավորում է իրականացնում Հայաստանում: