ԵՐԵՎԱՆ, 21 հունիսի – Sputnik. Հայտնի ռուսաստանցի հումորիստ և շոումեն Գարիկ Մարտիրոսյանը Instagram-ի իր էջում տեղադրել է մի հատված «Մանկական ՈՒՀԱ» տաղանդների շոուից։
Կադրերում ժյուրիի անդամներից մեկը՝ հայտնի դերասան, ՈՒՀԱ չեմպիոն Միխայիլ Բաշկատովը, ցույց տալով փոքրիկ հայ տղային, ասում է․«Հիմա մենք գիտենք, որ խարիզմատիկ հայերը ոչ միայն Սոչիում են լինում, այլ նաև Մոսկվայում»։
Ապա ճշտում է․«Քո անունը Էդմո՞ն է»։ Ինչին տղան անմիջապես ու յուրահատուկ ձևով պատասխանում է․«Հա, ախպերս»` քրքիջի և ծափահարությունների ալիք բարձրացնելով դահլիճում։
Այնուհետև Բաշկատովը խնդրում է նրան ինչ-որ բան ներկայացնել։ Էդմոնը կանգնում է սինթեզատորի մոտ և շատ համով կերպով կատարում է Սուպեր Ժորիկի (հումորիստ Միշա Գալուստյանի ստեղծած հումորային կերպարն է) «Хочу тибя любицца» հիթը։ Գալուստյանն, ի դեպ, «Մանկական ՈՒՀԱ» հաղորդման վարողն է։
«ՍուպերԺորիկ, դիմացիր, երիտասարդ տաղանդները հասնում են հետևիցդ»,-իր հրապարակման տակ գրել է Գարիկը։
Մեկ օրում տեսանյութը դիտել են գրեթե 300 հազար անգամ։ Իսկ շոումենի հետևորդները միմյանց հերթ չտալով ուզում են պարզել, թե այդ ինչ հաղորդում է։ «Ի՞նչ հաղորդում է, ասեք, ախպերներ», «Գարիկ, հուշեք, խնդրում եմ, ի՞նչ հաղորդում է»։
Սկսնակ ՈՒՀԱ հերոսը, երևում է, շատերին է դուր եկել։
«Ջան Էդմոն», «Ապրես, վերջն ես», «Հզոր տղա», «Ընտիր», «Սուպեր»,-այսպես են մեկնաբանել Մարտիրոսյանի գրառումը հիացած հետևորդները։
Հիշեցնենք, որ «Մանկական ՈՒՀԱ»-ի երկրորդ եթերաշրջանի առաջին խաղը եթեր է գնացել հունիսի 15-ին՝ ռուսական СТС հեռուսաալիքով։ Պատանի հումորիստները շոուի ընթացքում ներկայացրել են իրենց լավագույն երաժշտական համարներն ու հումորային տեսարանները։ Նախագծին մասնակցելու համար 150 թիմերի 1500 մասնակիցներ նախընտրական փուլ են անցել «Անապայում»՝ ՈՒՀԱ-ի մանկական թիմերի Միջազգային փառատոնում։ Մրցույթի արդյունքներով СТС-ի նախագծին մասնակցում են 36 լավագույն թիմերը։