ԵՐԵՎԱՆ, 20 հունիսի –Sputnik. ՀՀ Ազգային ժողովի փոխնախագահ Ալեն Սիմոնյանը վստահեցնում է` իշխանությանը չի անհանգստացնում այն փաստը, որ ՀՀ երկրորդ նախագահ Ռոբերտ Քոչարյանին գրավի դիմաց ազատ են արձակել։ Սիմոնյանը նման կարծիք հայտնեց` ի պատասխան լրագրողների հարցին, թե իշխանությանն անհանգստացնո՞ւմ է Քոչարյանի ազատության մեջ գտնվելու փաստը։
«Իմ քայլն» այսօր նիստ էր անում, որին մասնակցվում էր նաև ՀՀ վարչապետ Նիկոլ Փաշինյանը։
«Մեզ ավելի շատ անհանգստացնում է մարդկանց զայրույթը և այն ընկալումը, թե ինչ–որ մեկին բռնել և մեկ ուրիշին բաց են թողնում։ Մենք դատարանի վճիռների մասին իմանում ենք, երբ դրանք հրապարակային են դառնում։ Մենք որևէ մեկին չենք բռնում և բաց թողնում. դա քաղաքական որոշում չի եղել»,–ասաց Սիմոնյանը։
Նա նշեց, որ իրավական պրոցեսը շարունակվում է, և էլի է եղել, որ Քոչարյանին ազատ արձակեն, և հետո խափանման միջոցը կրկին փոխվել է։
Սիմոնյանի խոսքով` իրավական գործընթացներին քաղաքական պատվեր վերագրելու յուրաքանչյուր փորձ տապալվելու է, քանի որ եթե այդ տրամաբանությունը գործեր, ապա Քոչարյանն այժմ ազատության մեջ չէր լինելու։
Հիշեցնենք, որ Վերաքննիչ քրեական դատարանի դատավոր Արսեն Նիկողոսյանը մասնակի բավարարել էր Քոչարյանի կալանքը փոխելու միջնորդությունները մերժելու մասին դատարանի որոշման դեմ բողոքը։ Քոչարյանն ազատ կարձակվի 2 միլիարդ դրամ գրավի դիմաց։ Գումարը վճարելու համար օրենքով կարճ ժամանակ է սահմանված՝ ընդամենը երկու օր։
Դրան հաջորդել էր ՀՀ դատախազության հայտարարությունը, ըստ որի`պատրաստվում են Վճռաբեկ դատարան բողոք ներկայացնել։
Մինչ այդ` դեռ մայիսի 8-ին, Քոչարյանի խափանման միջոցը փոխելու վերաբերյալ դատական նիստում ՀՀ նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը, ինչպես նաև Արցախի նախկին վարչապետ Անուշավան Դանիելյանը Քոչարյանի խափանման միջոց կալանքը անձնական երաշխավորությամբ փոխարինելու միջնորդություն էին ներկայացրել։
Մայիսի 13-ին Երևանի ընդհանուր իրավասության դատավոր Աննա Դանիբեկյանը մերժել էր միջնորդությունը։ Այս որոշումն էլ Վերաքննիչում բողոքարկել էին Քոչարյանի պաշտպանները, որն էլ մասնակի բավարարեց Վերաքննիչը։
Կենտրոնից հասկացրել են, որ դժգոհ են. ինչու Փաշինյանը չեղարկեց մոսկովյան այցը
ՀՀ երկրորդ նախագահին մեղադրանք է առաջադրվել 2008 թ–ի մարտի 1-ի բողոքի ակցիաները ցրելու ժամանակ սահմանադրական կարգը տապալելու համար։ Նա իրեն ուղղված մեղադրանքները քաղաքական հետապնդում է համարում։ 2018թ-ին Քոչարյանին երկու անգամ ձերբակալեցին:
2019 թվականի հունիսի վերջին նա ձերբակալվեց երրորդ անգամ: Երկրորդ նախագահին նաև կաշառք ստանալու մեղադրանք է առաջադրված։
«Իմ քայլը» նիստ է անում. ներկա են նաև Փաշինյանն ու կառավարության անդամներ