ԵՐԵՎԱՆ, 20 հունիսի –Sputnik. ՀՀ Ազգային ժողովի փոխնախագահ Ալեն Սիմոնյանը հայտնեց` շատ հնարավոր է, որ հաջորդ շաբաթ արտահերթ նիստ գումարվի։ Սիմոնյանը լրագրողների հետ զրույցում պատմեց, թե ինչ է քննակվել «Իմ քայլի» նիստին, որն ավարտվեց քիչ առաջ։
«Սա մեր հերթական հանդիպումն էր խմբակցության հետ, որի ժամանակ վարչապետը ելույթ ունեցավ, հնչեցին հարցեր։ Քննարկվել է ստեղծված իրավիճակը»,–ասաց Սիմոնյանը`հավելելով, որ ԱԺ արտահերթ նիստի օրակարգի մասին դեռ մանրամասներ ասել չի կարող։
Սիմոնյանը հայտնեց, որ նիստի 80 տոկոս ժամանակը ծախսվել է համավարակի թեման քննարկելու վրա։ Հարցին` Սահմանադրական դատարանի հարցը քննարկվե՞լ է, Սիմոնյանը պատասխանեց, որ տարբեր հարցեր են քննարկվել։
Անդրադառնալով ՍԴ նախագահ Հրայր Թովմասյանից «ազատվելու» նոր նախագծին` Սիմոնյանը նշեց, որ ընթացիկ զարգացումները տարբեր լուծումներ են պահանջում, և նախագիծը դեռ պետք է քննարկվի։
Նրա խոսքով` ՍԴ հարցը լուծելու համար հանրաքվեն ամենալավ ճանապարհն էր, սակայն համաճարակային վիճակը հաշվի առնելով` այն չեղարկվել է։ Այս պարագայում, ըստ Սիմոնյանի, մնում է երկրորդ տարբերակը` պատգամավորների միջոցով հարցին լուծում տալը։
Ի դեպ, նիստին մասնակցում էր նաև ՀՀ վարչապետ Նիկոլ Փաշինյանը, որը հրաժարվեց որևէ հարցի պատասխանել` ասելով, որ շտապում է։
«Իմ քայլը» գտել է Հրայր Թովմասյանին պաշտոնից ազատելու տարբերակը
Փաշինյանը, նստելով ավտոմեքենան, արագ հեռացավ։ Նա ներս մտնելիս նույնպես հրաժարվել էր որևէ հարցի պատասխանել։
Հիշեցնենք, որ նախօրեին «Իմ քայլը» խմբակցությունը ՀՀ ԱԺ խոսնակին ներկայացրեց սահմանադրական փոփոխությունների նախագիծ։
Ինչո՞ւ էր «Իմ քայլը» լռում. Մակունցը խոսել է ԲՀԿ–ի` ԱԺ նիստը բոյկոտելու մասին