ԵՐԵՎԱՆ, 18 հունիսի – Sputnik. Հայրենական մեծ պատերազմի վետերան Ռոզալյա Աբգարյանի ծննդյան օրն է այսօր։ Հերոսական ուղի անցած կինը դարձավ 97 տարեկան։ Նրան Facebook-ի իր էջում շնորհավորել է ՀՀ ԱԺ պատգամավոր Ալեքսեյ Սանդիկովը։ «Տիկին Ռոզալյան 97 տարեկան է։ Իր լավատեսությունն ու կյանքի հանդեպ սերը միայն գովերգի է արժանի։ Այն ինչ տեսել է նա իր կյանքում՝ Մեծ Հայրենական պատերազմի տարիներին, Աստված տա՝ ոչ ոք չտեսնի»,–գրել է պատգամավոր։
Դիմակ կրելուց բողոքողներին նա հիշեցրել է, որ երևի չեն էլ պատկերացնում տիկին Ռոզալիայի մեդալների գոնե կեսի քաշը, որոնք նա հեշտությամբ է կրում։
«Ցավոք, տատիկներս վաղուց չկան, բայց տիկին Ռոզալյան իր հեռախոսազանգերով ու ջերմությամբ չի թողնում մոռանալ տատիկների հոգատարության արժեքը։ Ծնունդդ շնորհավո՛ր, սիրելի՛ վետերան»,–գրել է Սանդիկովը։
Ռոզալյա Աբգարյանը ծնվել է 1923թ–ին, Թբիլիսիում։ Դպրոցն ավարտելուց հետո՝ 18 տարեկանում, Ռոզալյան եռամսյա կուրսեր է անցել և մեկնել է ռազմաճակատ, եղել է կապավոր։ 1941 թվականի վերջին Ստալինգրադում վիրավորվել է գլխից և հոսպտալացվել։ Ապաքինելուց հետո ուղարկվել է Վորոշիլովգրադ։ Երկրորդ անգամ վիրավորվել է դեմքից։ Մասնակցել է Ուկրաինայի, Ռոստովի, Նովոսիբիրսկի, Կրասնոդարի, Լեհաստանի, Հունգարիայի և Չեխոսլովակիայի ազատագրմանը: Ռոզալյա Աբգարյանի մարտական ուղին ավարտվել է Պրագայում։
97–ամյա Ռոզալյա Աբգարյանը հաղթել է «Մոսկվա, ես սիրում եմ քեզ» մրցույթում
Պատերազմի ավարտից հետո վերադարձել է Թբիլիսի և 1945 թվականի վերջին ամուսնացել։ Ամուսինը՝ Եզնիկ Նալբանդյանը, եղել է զինվորական, ծառայել է Լեհաստանում։ Ամուսնությունից հետո նրանք մեկնել են Լեհաստան, իսկ ամուսնու զորացրվելուց հետո՝ վերադարձել Հայաստան, որտեղ ամուսինն աշխատանքի է անցել Հայաստանի ներքին գործերի համակարգում։ Ռոզալյա բգարյանն ավարտել է Երևանի պետական համալսարանի բանասիրության ֆակուլտետը, զբաղվել է մանկավարժական գործունեությամբ։