ԵՐԵՎԱՆ, 18 հունիսի – Sputnik. Կառավարության այսօրվա նիստում հաստատվեց կորոնավիրուսի տնտեսական հետևանքների չեզոքացման 20-րդ միջոցառումը: Ինչպես նախագծի ներկայացման ժամանակ հայտնեց ՀՀ աշխատանքի և սոցիալական հարցերի նախարար Զարուհի Բաթոյանը, հերթական աջակցությունից կօգտվեն մասնավոր հատվածի տուժած ոլորտների աշխատողներն ու անհատ ձեռնարկատերերը:
«Սույն որոշմամբ տուժած ոլորտներ են համարվում հյուրանոցային և հյուրատնային ծառայությունները, հանրային սննդի, զբոսաշրջային, նախադպրոցական կրթության (մասնավոր մանկապարտեզներ), սպորտային ակումբները, լողավազանները, զվարճությունների և հանգստի կազմակերպման գործունեությունը, կինոթատրոնները, լուսանկարչության բնագավառում գործունեությունը, ավտոմեքենաների և այլ առարկաների վարձույթը, մշակույթի, երաժշտության, սպորտի, պարի բնագավառում, ստեղծագործական, արվեստի և հանդիսադիր ներկայացումների կազմակերպման, խաղատների գործունեությունը»,- ասաց Բաթոյանը:
Պետական այս աջակցությունից կօգտվեն թվարկված ոլորտների այն աշխատողները, որոնք 2020 թվականի մարտի 1-ից մինչև հունիսի 15-ը առնվազն 1 օր աշխատանքային պայմանագիր են ունեցել տվյալ ոլորտի գործատուի հետ:
Աջակցություն ստացողների շրջանակն ընդլայնվեց. վարձու աշխատողներից ովքե՞ր կներառվեն ծրագրում
Իսկ անհատ ձեռնարկատերերը շահառու են հանդիսանում՝ անկախ 2020 թվականի 1-ին եռամսյակում իրացման շրջանառության չափից։
Աջակցությունը լինելու է միանվագ՝ նվազագույն աշխատավարձի չափով՝ 55 000 դրամ:
Գումարը փոխանցվելու է բացառապես անկանխիկ եղանակով՝ բանկային քարտի վրա:
Զարուհի Բաթոյանը նշեց, որ դիմումները կընդունվեն հունիսի 22-ից սկսած:
Հակաճգնաժամային միջոցառումների շրջանակներում 100 մլրդ դրամ աջակցություն է ցուցաբերվել