ԵՐԵՎԱն, 16 հունիսի - Sputnik. ԱԺ «Լուսավոր Հայաստան» խմբակցության ղեկավար Էդմոն Մարուքյանը, հայտնելով ԼՀԿ–ի դիրքորոշումը ԲՀԿ ղեկավար Գագիկ Ծառուկյանին մանդատից զրկելու հարցի առնչությամբ, ասաց, որ իրենք չեն մասնակցելու քվեարկությանը։
Նա հիշեցրեց` մեկ տարի առաջ իշխանության ներկայացուցիչները ողջ կազմով մասնակցում էին Ծառուկյանի որդու հարսանիքին, այդ թվում` վարչապետ Նիկոլ Փաշինյանը։ Իսկ այժմ, ըստ Մարուքյանի, նրանք Ծառուկյանի դեմ են ելույթներ ունենում։
«Մենք չենք մասնակցելու այս ֆարսին։ Ինձ հետաքրքիր է` եթե ԲՀԿ–ն էլ չմասնակցի քվեարկությունը, ապա փակ և գաղտնի քվեարկությամբ, հարգելի իշխանության ներկայացուցիչներ, ձեր 88 «Այո»–ն կարձանագրվի՞, թե՞ ոչ։ Տեսնենք այդ 88 հոգով միաձայն ասելո՞ւ եք ինչ–որ բան»,–նշեց Մարուքյանը` հավելելով, որ եղածն, ըստ էության, անազնիվ խաղ է։
«Լավ եմ արել՝ գրել եմ». Ուրիխանյանը խոստովանեց՝ իր ձեռքով է գրել հավատարմության երդումը
ԱԺ «Բարգավաճ Հայաստան» խմբակցության անունից իր ելույթում պատգամավոր Նաիրա Զոհրաբյանը հայտարարեց, որ Գագիկ Ծառուկյանի նկատմամբ հարուցված քրեական գործը, որն ինքը որակեց «ԱԱԾ մանուկ ղեկավարի միջոցով իրականացված ֆարս», հասնելու է Եվրոպական դատարան:
«Մտքներվդ չանցնի, թե կարող եք մեզ վախեցնել: Դուք բյուրեղացրեցիք մեզ, այ դրա համար շնորհակալություն: Դուք մեր կողքին հավաքեցիք այս երկրով մտահոգ մարդկանց, մտավորականներին, որոնցից շատերն ընտրել էին լռությունը՝ վախենալով, որ սոցիալական ցանցում ՊՈԱԿ-ի Հովոյի մի ֆասով ֆեյքերը կսկսեն նաև այդ մտավորականներին հայհոյել»,- ասաց Զոհրաբյանը:
«Նորից գնում եմ ԱԱԾ` նոր գործեր կան, էն հներից բան դուրս չեկավ». Ծառուկյան
Նա նաև հայտարարեց, որ այսօրվանից ԲՀԿ-ն սկսում է ՀՀ գլխավո դատախազին անվստահություն հայտնելու գործընթացը:
«Իմ քայլը» խմբակցության անունից իր ելույթում Ալեն Սիմոնյանն էլ շնորհակալություն հայտնեց այն քաղաքացիներին, որոնք այս պահին ոստիկանությանն աջակցում են ՀՀ և Երևանի ավտոճանապարհները փակած «Մուլտի Գրուպի» ավտոմեքենաներից ազատելու հարցում: Իսկ իր ընդդիմադիր գործընկերներին առաջարկեց խոսել ոչ թե Ծառուկյանի ներդրած գումարներից, այլ այդ գումարի ծագումնաբանությունից:
Անդրադառնալով Ծառուկյանին պատգամավորական անձեռնմխելիութունից զրկելու հարցի քվեարկությանը, Սիմոնյանը հայտարարոեց, որ «Իմ քայլի» պատգամավորները կքվեարկեն «իրենց խղճից ու համոզմունքներից դրդված»:
Նշենք, որ ՀՀ գլխավոր դատախազ Արթուր Դավթյանն այսօր Ազգային ժողովին է ներկայացրել պատգամավոր Ծառուկյանի նկատմամբ քրեական հետապնդում հարուցելու և ազատությունից զրկելու համաձայնություն տալու վերաբերյալ միջնորդագրեր:
Հիշեցնենք՝ ՀՀ ԱԱԾ-ն հունիսի 14-ի վաղ առավոտից խուզարկություն է իրականացրել ԲՀԿ առաջնորդ, պատգամավոր Գագիկ Ծառուկյանի Առինջի առանձնատանը: Ավելի ուշ Ծառուկյանին հրավիրել էին ԱԱԾ՝ հարցաքննության:
Ծառուկյանի հարցաքննության ընթացքում ԱԱԾ-ն հանդես եկավ մի քանի պաշտոնական հայտարարություններով, որոնցում ներկայացրեց Ծառուկյանի նկատմամբ կատարված քննչական գործողությունների իրավական հիմքերն ու հարուցված 3 քրեական գործերը:
Ի՞նչ փաստեր ներկայացրեց Դավթյանը Ծառուկյանին անձենմխելիությունից զրկելու համար. տեսանյութ
Առաջինը «Շանգրի Լա» և «Օնիրա Քլաբ» խաղատներին վերաբերող գործն է, որի համաձայն, դրանց ապօրինի ձեռնարկատիրական գործունեության հետևանքով պետությանը հասցվել է շուրջ 30 մլրդ դրամի վնաս: Երկրորդ քրգործը վերաբերում է 2017թ-ի խորհրդարանական ընտրություններին: Ըստ գործի նյութերի՝ ԲՀԿ-ն հարյուր հազարների ընտրակաշառք է բաժանել: Իսկ
երրորդ քրեական գործը վերաբերում է Կոտայքի մարզի Առինջ համայնքում Ծառուկյանին պատկանող «Նյու» ընկերությանն օտարված հողատարածքին: Առինջի գյուղապետի ու ավագանու անդամների անօրինական որոշումների արդյունքում, ըստ գործի, համայնքին պատճառվել է շուրջ 400 մլն դրամի վնաս: Երեք քրեական գործերով նախաքննությունը շարունակվում է:
Այսօր ԱԱԾ-ն հանդես եկավ նաև չորրորդ քրեական գործի մասին հայտարարությամբ, որը վերաբերում է արդեն 2017թ-ի Երևանի ավագանու ընտրություններում ԲՀԿ-ի կատարած ընտրախախտումներին: