ԵՐԵՎԱՆ, 15 հունիսի – Sputnik. Երեկ խուզարկել են նաև ՀՀ Վերահսկիչ պալատի նախկին նախագահ, Համահայկական խաղերի համաշխարհային կոմիտեի նախագահ Իշխան Զաքարյանի տունը։ Տեղեկությունը Sputnik Արմենիայի հետ զրույցում հաստատեց Զաքարյանի փաստաբան Գեղամ Հակոբյանը։
«Զաքարյանի տան խուզարկության ժամանակ հայտնաբերվել են զենքեր, որոնք օրինական են եղել»,–ասաց Հակոբյանը։
Նա հայտնեց նաև, նոր խուզարկությունից հետ Զաքարյանը հրավիրվել է Ազգային անվտանգության ծառայություն ու հարցաքննվել 2017-ին խորհրդարանական ընտրությունների ժամանակ ԲՀԿ-ի ենթադրյալ ընտրակեղծիքների գործով։
Վերահսկիչ պալատի նախկին նախագահն այս քրգործով ունի վկայի կարգավիճակ։ Փաստաբանի խոսքով` քանի որ Իշխան Զաքարյանը 2017-ին եղել է շտաբի ղեկավարը, կասկած է եղել, որ նա կարող է որևէ առնչություն ունենալ այդ ենթադրյալ կեղծիքներին։
Սակայն Զաքարյանին մեղադրանք չի առաջադրվել, ինչը, ըստ Հակոբյանի, փաստում է, որ այդ կասկածները հիմնավոր չեն եղել։
Հիշեցնենք` երեկ ՀՀ ազգային անվտանգության ծառայությունը հայտարարությունն էր հրապարակել և ներկայացրել ԲՀԿ առաջնորդ, ԱԺ պատգամավոր Գագիկ Ծառուկյանի ու նրա ղեկավարած կուսակցության այլ անդամների նկատմամբ կատարված քննչական գործողությունների իրավական հիմքը:
«Գլխավոր դերում» Գագիկ Ծառուկյանն է. ԱԱԾ–ն նոր տեսանյութ է հրապարակել
ԱԱԾ-ն նշել էր, որ իրականացված մեծածավալ քննչական և այլ դատավարական գործողությունների արդյունքում բացահայտվել են 2017 թ. ապրիլի 2-ին կայացած ՀՀ ԱԺ ընտրությունների ժամանակ ընտրողներին կաշառք տալու, կաշառք ստանալու հարյուրավոր դեպքեր:
Նշենք, որ ԱԱԾ–ի հայտարարությունից առաջ խուզարկել էին Ծառուկյանի տունը, հետո մոտ 8 ժամ հարցաքննել նրան։