ԵՐԵՎԱՆ, 13 հունիսի – Sputnik.Հայաստանի և Վրաստանի առողջապահության նախարարությունների մասնագետները տեսակոնֆերանս են անցկացրել և նոր տիպի SARS-CoV-2 կորոնավիրուսային վարակի դեմ պայքարի հարցեր քննարկել։
Կողմերը փորձի փոխանակում են արել և պայմանավորվել են նույն ձևաչափով նոր հանդիպում անցկացնել։
Ավելի վաղ հայտնի էր դարձել, որ երկու երկրների առողջապահական գերատեսչությունների հիմքով փորձի փոխանակման մշտական հարթակ կստեղծվի։ Համապատասխան պայմանավորվածությունը հեռախոսազրույցի ընթացքում ձեռք էին բերել երկու երկրների առողջապահության նախարարներ Արսեն Թորոսյանն ու Եկատերինա Տիկարիձեն։
«Հանդիպման թեման կոնկրետ կլինիկական կառավարման հարցերն էին։ Մենք պատմեցինք, թե ինչպես են այդ հարցերը լուծվում Վրաստանում և Հայաստանում, ինչպես նաև պայմանավորվեցինք ևս մեկ հանդիպում կազմակերպել, որտեղ կքննարկենք համագործակցության հստակ ոլորտները»,-տեսակոնֆերանսի ժամանակ ասել է Վրաստանի առողջապահության փոխնախարար Թամար Գաբունիան։
Նրա խոսքով՝ հայ գործընկերներին հետաքրքրում է Վրաստանի ռազմավարության ուսումնասիրությունը, որը թույլ է տվել կանխել վարակի զանգվածային տարածումը։
Մեկնաբանելով ավելի վաղ Արսեն Թորոսյանի հայտարարությամբ պայմանավորված աղմկահարույց դեպքը, որը բացասական արձագանք էր ստացել Վրաստանում, Թբիլիսիի ինֆեկցիոն հիվանդանոցի տնօրեն Թենգիզ Ցերցվաձեն վստահեցրել է, որ թեման փակված է։
«Հայկական կողմը չմտածված արտահայտություններ էր թույլ տվել։ Թեման համարենք փակված։ Մենք պետք է համագործակցենք»,-ասել է Ցերցվաձեն։
Նա նշել է, որ վրացական կողմը հայ գործընկերներին COVID-19-ի կառավարման վերաբերյալ տեղեկատվություն է տրամադրել։
Ինչպես հայտնում է ՀՀ ԱՆ մամուլի ծառայությունը. վրացական կողմը նշել է, որ նոր դեպքերը բացահայտելու համար թեստավորում է իրականացվում երկրի 18 լաբորատորիաներում, հետագայում դրանց թիվը կհասնի 24-ի։ Վրաստանում օրական 1400-1500 թեստ է արվում։
Հանդիպման ընթացքում երկուստեք քննարկվել է կորոնավիրուսային հիվանդության կասկածով պացիենտների բուժման համար հակաբիոտիկներ նշանակելու սկզբունքը, ինչպես նաև տրիաժի` ընդունման, ախտորոշման և տեղափոխման մեխանիզմներն ու մոտեցումները:
Գործընկերները հույս են հայտնել, որ ձեռնարկվող միջոցառումների շնորհիվ հնարավոր կլինի պատվով հաղթահարել այս մարտահրավերը:
Հունիսի 13-ի դրությամբ Հայաստանում նոր տիպի SARS-CoV-2 կորոնավիրուսով վարակվելու 16 004 դեպք է գրանցվել, Վրաստանում՝ 851։