ԵՐԵՎԱՆ, 11 հունիսի - Sputnik. Երևանի Սարի թաղում տղամարդն ալկոհոլի ազդեցության տակ դաժան ծեծի է ենթարկել իրեն հյուր գնացած ընկերոջը։ Տեղեկությունը հաղորդում են ՀՀ քննչական կոմիտեի մամուլի ծառայությունից։
Ըստ հաղորդագրության` հունիսի 6-ին՝ ժամը 05:30-ին, թիվ 1 համալսարանական հիվանդանոցից հաղորդում է ստացվել այն մասին, որ գանգուղեղային վնասվածք, կոմատոզ վիճակ ախտորոշմամբ բուժկենտրոն է ընդունվել Երևան քաղաքի 48-ամյա բնակիչ:
Քննության արդյունքում պարզվել է, որ նույն օրը՝ ժամը 03:30-ի սահմաններում, 60-ամյա տղամարդը Երևան քաղաքի Սարի թաղի 3-րդ փողոցում գտնվող իր տանը մեծ քանակությամբ ալկոհոլ օգտագործելուց հետո անձնական հարցերի շուրջ վիճաբանել է 48-ամյա ընկերոջ հետ։
«Վիճաբանության ընթացքում նա բռունցքներով բազմաթիվ հարվածներ է հասցրել վերջինիս գլխի շրջանին՝ պատճառելով կյանքին վտանգ սպառնացող ծանր վնաս»,- նշված է հաղորդագրության մեջ։
Կատարվել են մի շարք քննչական գործողություններ, նշանակվել դատակենսաբանական և դատաբժշկական փորձաքննություններ:
Ձեռք բերված բավարար ապացույցների համակցությամբ` Երևան քաղաքի 60-ամյա բնակչին մեղադրանք է առաջադրվել՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով:
Նրա նկատմամբ որպես խափանման միջոց է ընտրվել ստորագրություն՝ չհեռանալու մասին:
Նախաքննությունը շարունակվում է:
Տավուշում երիտասարդների վիճաբանությունը ողբերգական ավարտ է ունեցել. տեսանյութ