ԵՐԵՎԱՆ, 10 հունիսի – Sputnik. Երևանում գործող «Տաշիր» առևտրի կենտրոնի գործունեությունն ամբողջությամբ կասեցվել է։ Տեղեկությունը հայտնում են Հայկական միասնական տեղեկատվական կենտրոնից։
«Նախորդիվ ԱԱՏՄ աշխատակիցներն այստեղ արձանագրել էին մի շարք խախտումներ։ Մասնավորապես հիմնական տարածքներում արտաքին շփման մակերեսները չեն ախտահանվել, ոսկու շուկայի տարածքում չի պահպանվել սոցիալական հեռավորությունը, արձանագրվել են գծանշումների, իրազեկման պաստառների փակցման և այլ թերություններ»,-ասված է հաղորդագրության մեջ։
Տնտեսավարողը պատրաստակամություն է հայտնել շտկել դրանք։
Հիշեցնենք` ՀՀ կառավարությունը մայիսի 14–ի նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը, ժամը 17։00–ը ներառյալ։
Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։