Հակոբ ճաղարյանի դիտարկմամբ` ազգային փոխադրող չեն ստեղծում, այն չի հիմնադրվում պետության կողմից և պետության գումարներով։ Դա կախված է միջազգային ատյաններում խնդիրը ներկայացնելու ձևից։ Նման ավիաընկերությունը տվյալ երկրում ստեղծված, երկրի օրենքներով գործող, շուկայի հիմնական կամ միակ փոխադրողն է և շուկայական կարգավորումների հարցում հանդիսանում է ազգային գործիք։
«Ոչ մի տեղ ոչ մի բառով նշված չէ դրա սեփականության ձևի (պետական, մասնավոր կամ խառը), պետության կողմից դրան հատկացվելիք արտոնությունների կամ կայացման հարցում պետության մասնակցության մասին»,– նշում է ՀՀ վարչապետի ավիացիայի հարցերով նախկին խորհրդականը։
Հակոբ Ճաղարյանը մատնանշում է այն հանգամանքը, որ պետության հիմնական խնդիրն իր ավիացիոն շուկայի կարգավորումն է համաձայն միջազգային փաստաթղթերի, ինչը պետք է ապահովի հավասար, ազնիվ մրցակցություն։ Ըստ նրա` պետությունը ոչ թե պետք է գումար ներդնի, օդանավեր գնի, ընկերությանը սուբսիդավորի, այլ պետք է պայմաններ ստեղծի նման ընկերությունների կայացման համար։
«Շուկայի զարգացման վերաբերյալ իմ ներկայացրած ծրագրում շեշտել եմ, որ պետք է կատարել մի շարք գործողություններ, որոնք կապահովեն ու կպաշտպանեն հայկական ավիափոխադրումների շուկայի բոլոր մասնակիցների հավասար իրավունքները։ Տվյալ պահին մեր շուկայի մոտ 70 տոկոսը կազմում են ռուսական ուղղությունները, որտեղ չկա հավասարություն»,– նշում է Ճաղարյանը։
Նրա փոխանցմամբ` եվրոպական ուղղություններով թռիչքներ կատարելու համար անհրաժեշտ են համապատասխան թույլտվություններ, ինչից մենք զրկվեցինք այս տարվա մայիսին։ Ըստ նրա` մինչև վերոհիշյալ երկու գլխավոր խնդիրները չլուծվեն, որևէ ընկերություն Հայաստանում կայանալու շատ քիչ հավանականություն ունի, նույնիսկ եթե պետությունը դրա համար գումարներ տրամադրի։
Փաշինյանը մնաց առանց ավիացիոն խորհրդականի. ի՞նչ կոնֆլիկտ կար Ճաղարյանի ու Ռևազյանի միջև
Նշենք, որ հունիսի 10–ին Տարածքային կառավարման ու ենթակառուցվածքների նախարար Սուրեն Պապաիկյանը ԱԺ–ում վստահեցրել է, որ առաջիկայում ամեն ինչ անելու է, որպեսզի Հայաստանն ունենա տեղական ավիացիա, բայց իրական հայաստանյան ավիափոխադրող և ոչ թե վիրտուալ, Հայաստանում ձևական գրանցված ինչ-որ արհեստական միավոր։