ԵՐԵՎԱՆ, 10 հունիսի - Sputnik. ԲՀԿ-ն Հայաստանում իշխանափոխություն իրականացնելու ներուժ չունի: Այսօր Աժ-ում լրագրողների հետ զրույցում նման կարծիք հայտնեց Կոտայքի մարզպետ Ռոմանոս Պետրոսյանը:
«ՀՀ-ում իշխանափոխություն անողը ժողովուրդն է: Կոչեր, իհարկե, կարող են հնչեցնել, փորձեր այս պահին՝ համավարակով պայմանավորված, իհարկե, չեն կարող անել, որովհետև հավաքների խիստ սահմանափակումներ ունենք: Բայց ես խիստ թերահավատորեն եմ նայում այդ կոչերին»,-ասաց մարզպետը:
Նա համոզմունք հայտնեց, որ նման կոչերի հիմնական մոտիվացիան իշխանության այն հայտարարությունն է, որ Հայաստանում այլևս չկա օլիգարխիա:
«Այդ խավին զրկելով պետական կառավարման ինստիտուտների վրա ազդելու հնարավորությունից, այդ խավին բերելով հարկման, քվոտավորումներից զերծ տնտեսական դաշտ, բնական է, որ այդ խավը կարող է դիսկոմֆորտ զգալ ու փորձեր անել նախկին ստատուս քվոներին վերադառնալու»,- նշեց Պետրոսյանը:
«Նախկիններն օգտագործում են Ծառուկյանին` հարվածելու գործող իշխանությանը». Հովսեփյան
Ինչ վերաբերում է իր ղեկավարած մարզում կոռուպցիոն երևութների առկայությանը, Պետրոսյանը շեշտեց, որ իր նշանակումից ի վեր, մարզում չորս տասնյակից ավելի կոռուպցիոն բնույթի քրեական գործեր են հարուցվել, որոնցով անցնում են համայնքների գործող ու նախկին ղեկավարներ, դպրոցների տնօրեններ, ՏԻՄ ներկայացուցիչներ: Նրանց մի մասը, Պետրոսյանի ձևակերպմամբ՝ սերտ համագործակցության մեջ է գտնվում, կամ գտնվել Բարգավաճ Հայաստան» կուսակցության հետ:
«Մուլտի գրուպի» գլխավոր տնօրենին մեղադրանք է առաջադրվել
Առերևույթ իրավախախտումների մի շարք դեպքեր էլ, մարզպետի խոսքով, առնչություն ունեն Գագիկ Ծառուկյանին պատկանող «Մուլտի Գրուպ» կոնցեռնի հետ:
Հիշեցնենք՝ ԲՀԿ առաջնորդ Գագիկ Ծառուկյանի դեմ հայտարարություններն ու հրապարակումները հաջորդեցին հունիսի 6-ին «Բարգավաճ Հայաստան» կուսակցության քաղխորհրդի նիստում Ծառուկյանի ելույթին, որում նա հայտարարեց, որ ՀՀ կառավարության ոչ թե 97, այլ 100 տոկոսը պետք է փոխվի: