Քաղտեխնոլոգ Վիգեն Հակոբյանի դիտարկմամբ` պաշտոնաթողությունները թելադրված են առկա իրավիճակով: Եթե դիտարկենք այն խորը ճգնաժամը, որն արդեն կա Հայաստանում և բացատրվում է համավարակի դեմ պայքարի խոշոր ձախողմամբ, դրան գումարած սոցիալ–տնտեսական բարդագույն իրավիճակն ու ներքաղաքական սրացումները, ապա պատկերը դառնում է ամբողջական։
«Պաշտոնաթողությունները վկայում են Նիկոլ Փաշինյանի անմիջական ռեակցիայի մասին։ Վարչապետն օրեր առաջ հայտարարեց, որ իրեն ճիշտ կամ ամբողջական ինֆորմացիա չեն տալիս` ասելով, որ ուժային կառույցների ղեկավարների հետ ունեցել է կոշտ խոսակցություն, ուստի նրա ֆեյսբուքյան ֆլեշմոբը դիտարկվեց որպես հանրության տարբեր խավերից ինֆորմացիա ստանալու այլընտրանքային տարբերակ։ Հենց դա էր վարչապետի տեղեկատվական հենքը, հետևաբար ակնհայտ էր, որ Փաշինյանի մոտ կար անվստահություն ուժային կառույցների նկատմամբ, ինչն ըստ էության սրվել է»,– նշում է քաղտեխնոլոգը։
Վիգեն Հակոբյանի կարծիքով` իրավիճակի սոցիալ–տնտեսական հետևանքները շատ ավելի լուրջ են լինելու վարչապետի համար, քան համավարակի խնդիրն ու ներքաղաքական սրացումները։ Քաղտեխնոլոգը չի բացառում նաև այն հանգամանքը, որ հնարավոր են ուժային կառույցների կողմից անհամաձայնություններ վարչապետի հանձնարարականների առթիվ։
«Այդուհանդերձ պաշտոնաթող եղած անձինք երկար ժամանակ աշխատել են համակարգում և շատ լավ հասկանում են, թե ինչ է կատարվում, կռահում էին Փաշինյանի ռեակցիան ու կատարում այնպիսի գործողություններ, որոնք խթանում էին նշված գործընթացը։ Տպավորություն է, որ իրենք նույնպես ցանկանում էին այս պահին հեռանալ։ Օրինակ` ՀՀ ԶՈՒ գենշտաբի պետը չէր կարող չընկալել, թե ինչ արձագանք կունենար իր տղայի հարսանյաց հանդեսը համավարակի փսիխոզի կամ վարչապետի ֆլեշմոբի պայմաններում»,– նշում է քաղտեխնոլոգը։
Քաղտեխնոլոգի եզրահանգմամամբ` վարչապետի մոտ կա անվստահության ընդհանուր մթնոլորտ և մտահոգություն առ այն, որ ներքաղաքական կոնյուկտուրան ենթարկվել է լուրջ և տեսանելի տրանսֆորմացիայի։
Պաշտոնյայի գործողությունները չպետք է հակասեն վարչապետի ասածի կոնտեքստին. Փաշինյան
Հիշեցնենք, որ այսօր ՀՀ վարչապետ Նիկոլ Փաշինյանի առաջարկով ՀՀ նախագահ Արմեն Սարգսյանը երեք հրամանագիր է ստորագրել, որոնցով պաշտոնից ազատել է ԱԱԾ ղեկավար Էդուարդ Մարտիրոսյանին, ոստիկանության պետ Արման Սարգսյանին և ՀՀ ԶՈւ գլխավոր շտաբի պետ Արտակ Դավթյանին։