ԵՐԵՎԱՆ, 7 հունիսի - Sputnik. Հասարակական գիտակցության մեջ անընդհատ թյուրիմացություն է գեներացվում: Այսպիսի կարծիք ունի ՀՀ նախկին ոստիկանապետ Վլադիմիր Գասպարյանը։ Facebook-ի իր էջում նա ծավալուն գրառում է կատարել՝ նշելով, թե հենց իշխանությունը հանձնելու խնդիր է դրվում, «քայլիստները» հնչեցնում են մեղադրանքը՝ ուզում եք հները հետ գա՞ն:
«Միանգամից ասեմ. հները հետ չեն գալու: Հույներն ասում են՝ նորից նույն ջուրը չես մտնի: Ու պատճառը ոչ թե մտնողի ուզել-չուզելն է, այլ այն, որ ջուրն է փոխվում: Մեր երկրի ջրերն անշրջելի՛ փոխվել են: Այնպես որ, մանիպուլացնել պետք չէ. հները հետ չեն գալու, կգան նորերը, որոնց պետք է փոխանցել հների փորձը, պետականամետությունը, «մենք»-ի զգացումը և այլն: Հների իմացությունից ու կարողություններից խոսեցի, և արդեն լսում եմ ոմանց աղմուկը: Սա էլ ասեմ, ու անցնենք առաջ. ահագին «քայլիստներ» ու «քլնգիստներ», չգիտես ինչու, համոզված են, որ հները հատկապես իրե՛նց աչքն են հանել, չնայած իրենց գերհամեստ ունակություններով ծլել-ծաղկել են հենց նրանց ստեղծած պայմաններում (շատերին անձամբ եմ ճանաչում ու կարող եմ վկայել, իրենք էլ կվկայեն, եթե մի կաթիլ ազնվություն ունեն)...»,- գրել է Գասպարյանը։
Նա հավելել է, որ իմքայլականները պետք է հասկանան՝մարդկանց հիշողության մեջ մնալու են այն լավով, որը կթողնեն երկրին: Դրա համար պետք է կարողանան իրենց բերած լավը տարբերակեն վատից և դա անեն հրապարակայնորեն։ Նախկին ոստիկանապետը վստահ է, որ պետք է անցնել «մեղքի գիտակցում-ապաշխարություն-թողություն ճանապարհը», որպեսզի ժողովուրդն ազգ դառնա, այլապես ամբոխացումն է սպառնում։
Ապա Գասպարյանը թվարկել է այն մեղքերը, որոնք պետք է անցնեն այդ ճանապարհը՝ հպարտություն, նախանձ, զազրախոսություն, փառատենչություն, սուտ, կեղծավորություն... Բայց նրա կարծիքով՝ գլխավորը կռապաշտությունն է, որի հաղթանակին ականատես եղանք երկու տարի առաջ մեր հրապարակներում ու փողոցներում:
Վլադիմիր Գասպարյանը 900 մլն դրամ պետք է վճարի իր տան նախկին սեփականատիրոջը
«Շատերն էլ մասնակցել են՝ թմբուկ են զարկել, պար են բռնել կուռքի շուրջը, պաշտամունքային գոռգոռացել են: Բոլորից առաջ այդ այլանդակ ծեսի գաղափարախոսներն ու կազմակերպիչները պիտի թողություն խնդրեն: Ու ներում ստանալով՝ հեռանան, որ իրենցից հետո լա՛վը հիշվի: Իսկ լավ գործեր, կրկնում եմ, կան: Օրինակ՝ երկիրն այնպիսի ծայրահեղ վիճակի բերեցին, որ վերջապես ջոկվեց չարը բարուց, լավը՝ վատից, դավաճանը՝ հավատավորից: Մեզ այնքան մոտեցրին աղետի եզրին, որ գործով սկսեցինք սիրել հայրենիքը: Այնքան տեսանելի դարձրին կռապաշտն ու քրիստոնյան, որ կարող ենք ընտրություն անել...Ուրեմն լինելին պիտի՛ կատարվի և կկատարվի»,- գրել է Վլադիմիր Գասպարյանը, ապա շարունակել, որ ամեն ինչ Տիրոջ կամքով է արվում, առանց Տիրոջ կամքի անգամ տերևը ծառից չի ընկնում: Նա դիմել է իմքայլականներին՝ նշելով, որ նրանք էլ հենց Տիրոջ կամքով կամ ընկնելու, կամ՝ բարձրանալու, կամ սիրո, կամ էլ անեծքի են արժանանալու։
«Ինչպես որ դատարկ տեղը Տիրոջդ անունը չպիտի տաս, այնպես էլ դատարկ տեղը մի՛ վախեցրեք մարդկանց հների վերադարձի փուչ սպառնալիքով: Ասում եմ՝ երկրիս ջրերը փոխվել են, ու մեզնից է կախված, թե զուլալվելուց հետո ով կապրի պարզ ջրերում, և ով անիծված ու հալածական կդեգերի երկրի երեսին: Կայենությունն անիծված է: Սթափվե՛ք. այս ծայրահեղ վիճակում կայենություն մի՛ արեք: Հրապարակավ ընդունեք ձեր մեղքը, ապաշխարեք ու հեռացեք, և ազգ դարձած ժողովուրդը ոչ միայն վատը կների, այլև կհիշի այն լավը, որ բերել եք»,- աստվածաշնչյան համեմատություններով կոչ է արել Գասպարյանն ու հավելել, որ «Պատիվ ունեմ» արտահայտությունը «հայրենիքից» հետո ամենաթանկն է զինվորականների համար: Երանի նրան, ով վաստակում է այն ասելու իրավունքը:
«Դուք ունեք դրա միակ ու վերջին հնարավորությունը, տիկնայք և պարոնայք «քայլիստնե՛ր»: Չվրիպե՛ք...»,- եզրափակել է նախկին ոստիկանապետը։
Հիշեցնենք` 2019թ–ի սեպտեմբերի 18–ին ՀՀ քննչական կոմիտեում քննվող քրեական գործով Վլադիմիր Գասպարյանին մեղադրանք էր առաջադրվել իշխանությունը չարաշահելու, իշխանազանցության կամ իշխանության անգործության համար, որոնք անզգուշությամբ նյութական ծանր հետևանքներ են առաջացրել: Նրա նկատմամբ որպես խափանման միջոց է ընտրվել չհեռանալու մասին ստորագրությունը: