ԵՐԵՎԱՆ, 7 հունիսի –Sputnik. Խառը ոճի մենամարտերի իռլանդացի հայտի մարտիկ, կիսաթեթև և թեթև քաշային կարգերում UFC նախկին չեմպիոն Քոնոր ՄաքԳրեգորը դարձյալ հայտարարել է իր սպորտային կարիերայի ավարտի մասին։
Տեղեկությունը 31-ամյա մարզիկը հայտնել է Twitter–ի միկրոբլոգում` Լաս Վեգասում տեղի ունեցած UFC 250 մրցաշարից հետո, որին նա որոշել էր չմասնակցել։
«Ողջույն, տղերք, ես որոշել եմ վերջ տալ մարտերին։ Շնորհակալ եմ բոլորին զարմանահրաշ հիշողությունների համար։ Հիանալի զբոսանք էր», – գրել է ՄաքԳրեգորը։
Նա նաև մոր հետ լուսանկար է հրապարակել, որն արվել էր իր հաղթանակներից մեկից հետո։
UFC–ի նախագահ Դանա Ուայթն իր հերթին, մեկնաբանելով մարզիկի որոշումը, ասել է, որ գիտի, թե ինչ պատճառով է Քոնորին ուզում կարիերան ավարտել։ MMA Junkie–ի փոխանցմամբ` Ուայթն ասել է, որ Մաքգրեգորը հիասթափված է, որ այլևս չի կարողանում իր ուզածի պես պայքարել։
«Քոնորն ուզում է կռվել։ Նա հիասթափված է, որ չի կռվում, և դա է դարձել նրա որոշման պատճառներից մեկը, համոզված եմ», – ասել է նա։
Նշենք, որ Քոնորն իր պրոֆեսիոնալ կարիերան սկսել է 2008 թվականին և 26 մենամարտ անցկացրել, որոնցից հաղթել է 22-ում և պարտվել 4-ում։
ՄաքԳրեգորը մարտի մեկնարկից 40 վայրկյան անց նոկաուտի ենթարկեց հակառակորդին. տեսանյութ
Սպորտից հեռանալու որոշում ՄաքԳրեգորն արդեն երրորդ անգամն է կայացնում։ Առաջին անգամ նա հայտարարեց կարիերայի ավարտի մասին դեռևս 2016 թվականին։ Երկրորդ անգամ սպորտը լքելու մասին մարզիկը հայտարարել էր 2019 թվականին, սակայն հետո մտափոխվել էր։