ԵՐԵՎԱՆ, 7 հունիսի - Sputnik. Հայաստանում կորոնավիրուսի հետևանքով ստեղծված և օրեցօր վատթարացող իրավիճակում Շտապ բժշկական օգնության ծառայության 1-03 և Առողջապահության նախարարության թեժ գիծը գերծանրաբեռնված են։ Այդ պատճառով արտակարգ իրավիճակների նախարար Ֆելիքս Ցոլակյանի հանձնարարականով ԱԻՆ հերթապահ բժիշկների թիվը կրկնապատկվել է։ Facebook-ի իր պաշտոնական էջում նախարարը գրել է, որ ցանկացած խնդրի դեպքում քաղաքացիները կարող են զանգահարել 911 հեռախոսահամարին և շուրջօրյա անվճար բժշկական խորհրդատվություն ստանալ։
«#covid19 վարակով և այլ հանգամանքներով պայմանավորված հոգեբանական խորհրդատվության կարիք ունեցող քաղաքացիները կարող են կապ հաստատել մեր հոգեբանների հետ նաև հետևյալ հեռախոսահամարներով, որոնք ևս գործում են 24/7 ռեժիմով՝ 060 712 444, 010 360 684»,- գրել է Ցոլակյանը՝ հավելելով, որ անհրաժեշտության դեպքում քաղաքացիները կարող են նաև հեռավար հոգեբանական աջակցություն ստանալ՝ տեսակապի միջոցով։ Այս դեպքում անհրաժեշտ է կապ հաստատել հոգեբանի հետ +374 41 911 006 Վայբերի հեռախոսահամարով։
Նախարարը ևս մեկ անգամ հորդորել է քաղաքացիներին մնալ տանն ու խստորեն հետևել պարետատան ցուցումներին։ Նա առողջություն է մաղթել հիվանդներին և հավելել.
«Խիղճ և խաղաղություն բոլորիս...»։
Նախարարությունը բժշկական կենտրոններին հորդորում է օգնել COVID-ի դեմ պայքարում
Ավելի վաղ գրել էինք, որ ՀՀ արտակարգ իրավիճակների նախարարը Ֆելիքս Ցոլակյանը մարտի 31-ից աշխատում է տնից։ Sputnik Արմենիայի հետ զրույցում նախարարի մամուլի խոսնակ Էդմոն Զարգարյանը հաստատել էր տեղեկությունը՝ նշելով, որ 68-ամյա նախարարը ռիսկային խմբում է, ուստի որոշում է կայացվել աշխատել հեռավար ռեժիմով։