ԵՐԵՎԱՆ, 4 հունիսի – Sputnik. Զինված ուժերում, բարեբախտաբար, կորոնավիրուսը լայն տարածում չունի. բանակում բռնկում չկա, վարակվածները քիչ են, ծանր դեպքեր գրեթե չկան։ «Արմենպրեսին» տված հարցազրույցում ասել է Հայաստանի Հանրապետության զինված ուժերի գլխավոր շտաբի պետ, գեներալ-լեյտենանտ Արտակ Դավթյանը։
«Մենք ժամանակին և բավականին լայնածավալ, արդյունավետ միջոցառումներ իրականացրինք դրա դեմն առնելու համար: Իհարկե, սա նաև մեծապես կախված է մեր բժիշկների աշխատանքից, փառք ու պատիվ նրանց: Վստահեցնում եմ՝ այս համավարակը չի կարող ազդել Զինված ուժերի մարտունակության վրա»,–ասել է Դավթյանը։
Նրա խոսքով` լրացուցիչ աշխատանք են իրականացնում ժամկետային զինծառայողների հետ, որոնց արձակուրդի հնարավորությունը սահմանափակվել է. կազմակերպում են հեռախոսային զրույցներ հարազատների հետ, ժամանցային, սպորտային միջոցառումներն են ավելացրել:
Անդրադառնալով զորակոչին` Դավթյանը նշել է, որ ամեն ինչ մտածված է և պլանավորված. արվելու է առավելագույնը խնդիրներից խուսափելու համար: Նա հայտնել է, որ անհրաժեշտության դեպքում նորակոչիկները թեստավորվելու են, մեկուսացվելու են որոշ ժամանակով, նախատեսված են նաև այլ ընթացակարգեր:
ԶՈւ գլխավոր շտաբի պետն ասել է նաև, որ պայմանագրային ծառայության համար դիմողների մեծ հոսք կա։ Չնայած ինչ-որ պահի իսկապես համավարակն ու սահմանափակումները խնդիրներ են առաջացրել, բայց լուծումներ են գտել ու գործընթացն այժմ բնականոն հունի մեջ է:
Հայաստանում կորոնավիրուսով վարակվածների թիվը հասել է 11 221–ի։
Համաճարակային վիճակն ավելի է վատանում. Նիկոլ Փաշինյան
Հիշեցնենք` ՀՀ կառավարությունը մայիսի 14–ի նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը` ժամը 17։00–ը ներառյալ։
Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Այսօրվանից՝ հունիսի 4-ից, արտակարգ դրության ընթացքում կիրառվող կարգավորումներում փոփոխություններ և լրացումներ են ուժի մեջ մտել։ Այսուհետ բոլոր հանրային բաց տարածքներում դիմակ կրելը պարտադիր է։ Հանրային բաց վայրերում դիմակ կարող են չկրել միայն մինչև 6 տարեկան երեխաները, հեծանիվ վարողներն ու ֆիզիկական վարժություններ անողները։
ՀՀ–ում կորոնավիրուսից մահացածներից մեկը 44 տարեկան կին է. նոր տվյալներ