ԵՐԵՎԱՆ, 4 հունիսի - Sputnik. Առաջիկայում Երևանից և դեպի Երևան մի շարք չվերթեր կիրականացվեն։ Այս մասին տեղեկացնում է Հայաստանի Քաղաքացիական ավիացիայի կոմիտեի մամուլի ծառայությունը։
Հունիսի 5-ին կիրականացվի Նուր-Սուլթան-Երևան-Նուր-Սուլթան, հունիսի 6-ին՝ Մինսկ-Երևան-Մինսկ և Մոսկվա-Երևան, հունիսի 7-ին՝ Մինսկ-Երևան-Մինսկ և Կիև-Երևան-Կիև, իսկ հունիսի 8-ին՝ Մինսկ-Երևան-Մինսկ չվերթերը։
Ռուսաստանում, Ուկրաինայում, Բելառուսում և Ղազախստանում գտնվող ՀՀ քաղաքացիները կարող են հայրենիք վերադառնալ այս ռեյսերով։
«Պարետի ցուցումով ՀՀ Էկոնոմիկայի նախարարության Զբոսաշրջության կոմիտեն կուղեկցի ժամանած ուղևորներին դեպի ինքնամեկուսացման վայրեր, այսինքն՝ ուղևորների կողմից նախապես տրված հասցեներ։ Ուստի խնդրում ենք ժամանող ուղևորների հարազատներին անհարմարություններից զերծ մնալու նպատակով չգալ օդանավակայան», - նշված է Քաղավիացիայի կոմիտեի Facebook-յան էջում։
Ինչ չվերթեր են սպասվում առաջիկա օրերին. Քաղավիացիան նոր տեղեկություն է հրապարակել
Հիշեցնենք, որ մարտից փակ է Հայաստանի օդային սահմանը, բացառություն են միայն ՀՀ քաղաքացիներին հայրենիք վերադարձնող հատուկ չվերթները։ Կորոնավիուսային իրավիճակով պայմանավորված՝ Հայաստանում մարտի 16-ից արտակարգ դրություն է հայտարարվել, որն արդեն երկու անգամ երկարաձգվել է։ ՀՀ կառավարությունը վերջերս որոշում ընդունեց, որի համաձայն՝ արտակարգ դրությունը կգործի մինչև հունիսի 13-ը։
Դուբայ-Թբիլիսի չվերթով Վրաստան տեղափոխված ՀՀ քաղաքացիները ավտոբուսներով կվերադառնան ՀՀ