ԵՐԵՎԱՆ, 2 հունիսի - Sputnik.Հայաստանի Քաղավիացիայի կոմիտեն հայտնում է, որ թեև ՀՀ-ում գրանցված օդանավ շահագործողների՝ դեպի Եվրոպա չվերթեր իրականացնելու իրավունքը սահմանափակվում է (բացառությամբ քաղաքացիների տարհանման, մարդասիրական և բժշկական նպատակներով իրականացվող թռիչքների), բայց ՀՀ-ում գրանցված ավիաընկերությունները շարունակելու են չվերթեր իրականացնել դեպի այլ պետություններ:
Մայիսի 12-ին տեղի ունեցած Եվրոպական թռիչքային անվտանգության թիմի նիստում որոշում է կայացվել ՀՀ-ում գրանցված բոլոր օդանավ շահագործողներին ընդգրկել ԵՄ թռիչքային անվտանգության ցանկում, այլ կերպ ասած՝ Եվրամիության «սև ցուցակում»։ Որոշումը կայացվել է այս տարվա փետրվարին կատարված ԵՄ գնահատման այցի դիտողությունների հիման վրա։
Քաղավիացիան նշում է, որ որոշումը որևէ ազդեցություն չի ունենա այլ միջազգային ավիաընկերությունների կողմից ԵՄ-ից դեպի ՀՀ և ՀՀ-ից դեպի ԵՄ չվերթեր իրականացնելու վրա: Նրանք կշարունակեն Եվրամիության երկրներից դեպի ՀՀ և հակառակ ուղղությամբ չվերթեր իրականացնել։
«Համաձայն Եվրոպական հանձնաժողովի և ԵՄ թռիչքային անվտանգության կոմիտեի՝ ՀՀ-ում գրանցված օդանավ շահագործողներին ԵՄ թռիչքային անվտանգության ցանկում ընդգրկելու որոշման պատճառը երկար տարիներ շարունակ ՀՀ Քաղաքացիական ավիացիայի կոմիտեի կողմից ոչ պատշաճ վերահսկողության և ոչ լիարժեք սերտիֆիկացման գործառույթների իրականացումն է»,- նշված է Քաղավիացիայի տարածած հաղորդագրության մեջ։
Քաղավիացիան վստահեցնում է, որ 2019 թվականի նոյեմբերի 20-ին կայացած Եվրոպական թռիչքային անվտանգության թիմի նիստից հետո կոմիտեն անհրաժեշտ քայլեր է ձեռնարկել ՀՀ-ում թռիչքային անվտանգության մակարդակը բարձրացնելու նպատակով: Հաղորդագրության մեջ մեջբերվում է նաև ԵՄ ավիացիոն ոլորտի տնօրեն Ֆիլիպ Կոռնելիսի մեկնաբանությունը Քաղաքացիական ավիացիայի կատարած աշխատանքներին։
«Ես ուրախ էի տեսնել և արձանագրել ՀՀ կառավարության հանձնառությունը՝ աջակցելու Քաղաքացիական ավիացիայի կոմիտեին: Այդ աջակցությունը, Ձեր մասնագիտական կարողությունների և հմտությունների հետ մեկտեղ, մեծ դեր են խաղում վերոնշյալ խնդիրները լուծելու համար»,- գրել է Կոռնելիսը։
Քաղավիացիան հույս է հայտնել, որ բոլոր խնդիրները կլուծվեն միասնական ջանքերի շնորհիվ։
Ավելի վաղ հայտնել էինք, որ ԵՄ կայքում հրապարակված հաղորդագրության համաձայն` այսուհետ հայկական ավիաընկերությունների վրա շահագործման արգելք կտարածվի, քանի որ չեն համապատասխանում անվտանգության միջազգային չափանիշներին: Այս որոշումը կայացվել է Հայաստանի քաղավիացիայի կոմիտեի և հայկական 6 ավիափոխադրողների աշխատանքը վերլուծելուց հետո։
ԵՄ տրանսպորտի հարցերով հանձնակատար Ադինա Վալեանն նշել էր, որ Եվրոպական հանձնաժողովը, Եվրոպական միության թռիչքային անվտանգության գործակալության աջակցությամբ, պատրաստ է համագործակցել և ներդրումներ կատարել Հայաստանում թռիչքների անվտանգությունը բարձրացնելու համար։
«Սև ցուցակում» են ընդգրկվել նաև Աֆղանստանը, Անգոլան, Կոնգոն, Նեպալը, Սուդանը և մի քանի այլ պետություններ:
Ավելի վաղ ԶԼՄ-ներում տեղեկություն էր տարածվել, որ հայկական ավիաընկերությունները ԵՄ «սև ցուցակում» կընդգրկվեն ապրիլին։ Քաղավիացիայի կոմիտեի նախագահ Տաթևիկ Ռևազյանը հերքել էր այդ տեղեկությունը։