ԵՐԵՎԱՆ, 1 հունիսի – Sputnik. ԱԺ նախկին նախագահ Գալուստ Սահակյանի որդուն՝ Արման Սահակյանին, մեղադրանք է առաջադրվել պաշտոնեական լիազորությունների չարաշահելու համար: Տեղեկությունը Sputnik Արմենիային հայտնեց Քննչական կոմիտեի տեղեկատվության և հասարակայնության հետ կապերի բաժնի պետի պաշտոնակատար Ռիմա Եգանյանը:
«Արման Սահակյանին մեղադրանք է առաջադրվել քրեական օրենսգրքի 308-րդ հոդվածի 2-րդ կետով, այն է` պաշտոնեական լիազորությունների չարաշահելը, որն առաջացրել է ծանր հետևանքներ»,–ասաց Եգանյանը։
Նրա խոսքով` Սահակյանի նկատմամբ որպես խափանման միջոց է կիրառվել գրավը` 5 միլիոն դրամի չափով։
Հիշեցնենք` մայիսի 29-ին հայտնի դարձավ, որ Արման Սահակյանը մի քանի այլ անձանց հետ Երևանի դպրոցներից մեկին կից հողակտորի օտարման հետ կապված քրեական գործի շրջանակում ներգրավվել է որպես մեղադրյալ:
Նախաքննությունը շարունակվում է։
Արման Սահակյանը 2011-2018թթ-ին եղել է ՀՀ կառավարությանն առընթեր պետական գույքի կառավարման վարչության պետը: