ԵՐԵՎԱՆ, 1 հունիսի – Sputnik. Պարետ Տիգրան Ավինյանի հրահանգները չկատարելու համար Գյումրիում լայնածավալ կասեցումներ են արվել։ Միայն մեկ օրում այստեղ կասեցվել է 47 տնտեսվարողի գործունեություն։ Պատժվածների թվում են կարի խոշոր արտադրություններ։ Տեղեկությունը հայտնում է ՀՀ առողջապահական և աշխատանքի տեսչական մարմինը։
Նշվում է, որ լայնածավալ մշտադիտարկումներին զուգահեռ կասեցումները շարունակվում են։
«24 ժամով արգելվել է տարատեսակ ոլորտների տնտեսվարողների գործունեությունը՝ դեղատներ, առևտրի օբյեկտներ, ստոմատոլոգիական կլինիկաներ և այլն։ Պարետի հաստատած կանոնները չպահպանելու պատճառով և դրանց վերացման ժամանակ տալու նպատակադրմամբ ժամանակավոր կասեցվել է նաև մի շարք խոշոր կարի արտադրությունների աշխատանքը՝ «Սաստեքս», «Լենտեքս», «Սվետտեքս»»,–ասվում է ՀՀ ԱԱՏՄ–ի տարածած հաղորդագրության մեջ։
Խախտումների առումով մեծ թիվ են կազմում անհատ ձեռներեցները։
Հիշեցնենք`կորոնավիրուսի տարածումը կանխարգելելու նպատակով Հայաստանում հայտարարված է արտակարգ դրություն, որն ուժի մեջ կլինի մինչև հունիսի 13–ը։
Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։
Մայիսի 18–ից սկսած աշխատում է նաև հասարակական տրանսպորտը, բայց ուղևորների ու վարորդների համար դիմակ կրելու պարտադիր պահանջով։
Հայաստանում կորոնավիրուսով վարակվածների թիվը մեկ օրում ավելացել է 210-ով և հասել 9492–ի