ԵՐԵՎԱՆ, 29 մայիսի- Sputnik. ԱԻՆ մեքենաները շրջում են հանրապետության տարբեր բնակավայրերով, այցելում տարբեր փողոցներ ու բակեր՝ հիշեցնելով անվտանգության կանոնների մասին։ ՀՀ վարչապետ Նիկոլ Փաշինյանը Facebook-ի իր էջում այդ մասին վկայող տեսանյութ է հրապարակել։
«Շարունակվում են հանրային իրազեկման աշխատանքները»,- տեսանյութին կից գրել է Փաշինյանը։
Բարձրախոսով իրազեկող պատվիրակները նշում են, թե որքան կարևոր է դիմակ կրելը, սոցիալական հեռավորություն պահպանելն ու ձեռքերն ախտահանելը։
«Ուշադրություն, խոսում է ՀՀ կառավարությունը։ Սիրելի հայրենակիցներ, ՀՀ-ում կորոնավիրուսի համաճարակ է։ Բոլորիդ կոչ ենք անում կրել դիմակներ և դրանք հանել միայն սնվելիս։ Դիմակը պետք է կրել այնպես, որ այն փակի ձեր քիթը և բերանը։ Պարբերաբար ախտահանեք ձեր ձեռքերը և չախտահանված ձեռքերով մի դիպեք ձեր դեմքին։ Պահպանեք մեկ ու կես մետր սոցիալական հեռավորություն և բացառեք առանց դիմակի շփումը ձեր ընտանիքի անդամ չհանդիսացող անձանց հետ»,- հայտարարում են բարձրախոսով և ավելացնում, որ դիմակ կրելով հարյուրավոր կյանքեր կփրկվեն։
Ինչքան կծախսի մեկ ընտանիքը դիմակների համար
ԱԻՆ–ի աշխատակիցները նաև հիշեցնում են, որ դիմակն անհրաժեշտ է փոխել երեք-չորս ժամը մեկ։ Կարելի է օգտագործել ոչ միայն գործարանային արտադրության, այլև տանը պատրաստված դիմակներ։
Ուղերձի վերջում ՀՀ կառավարությունը շնորհակալություն է հայտնում քաղաքացիներին հակահամաճարակային կանոնները պահպանելու համար։
Հիշեցնենք՝ ամբողջ աշխարհում կորոնավիրուսով վարակակիրների թվով Հայաստանը 56-րդ տեղում է (8 676)։ Այսօր վարչապետ Նիկոլ Փաշինյանը հանդես եկավ ճեպազրույցով՝ հայտարարելով, թե մեկ միլիոն բնակչության հաշվով Հայաստանն արդեն առաջ է անցել Իրանին ու Ֆրանսիային, հավասարվել Ռուսաստանին։
Եթե վարակի տարածման տեմպը մեր երկրում չնվազի, ապա շուտով կմոտենանք Իտալիայի ցուցանիշին։ Ճեպազրույցի ժամանակ Փաշինյանն անդրադարձավ նաև մարտի 31-ին Առողջապահության համաշխարհային կազմակերպության հորդորին, որ դիմակ կրել պետք է հիվանդներին և հիվանդ խնամողներին։
«Սա անպատասխանատվության գագաթնակետն է». Ռուբինյանը` Մարուքյանի դիմակ չկրելու պահանջի մասին
Նա նշեց, որ այդ հայտարարությունն արվել է այն ժամանակ, երբ աշխարհում դիմակի պակաս կար, ի վերջո, սա նոր վիրուս է, որի դեմ պայքարելու արդյունավետ միջոցները ամբողջ մարդկությունը քայլ առ քայլ սովորում է։ Փաշինյանը նշեց, որ վստահ են՝ երեք պարզ կանոնները պահպանելով ոչ միայն կնվազեցնենք վարակի տարածման տեմպը, այլև կհաղթահարենք մեր երկրում համավարակը։