ԵՐԵՎԱՆ, 26 մայիսի – Sputnik. Այսօր պարետատան հերթական նիստի ավարտին կայացած բրիֆինգի ժամանակ ՀՀ վարչապետ Նիկոլ Փաշինյանն անդրադարձավ կորոնավիրուսի դեմ պայքարին ու մատնանշեց, թե որն է եղել կառավարության հիմնական սխալը:
COVID 19-ով հիվանդներից 250-ը գտնվում են ծանր վիճակում. նախարարը նոր տվյալներ է հրապարակել
«Երբ որ քաղաքացու համավարակային վարքագծի փոփոխություն տեղի ունենա, մենք կունենանք համավարակի հաղթահարում: Մենք ուրիշ մեթոդ չգիտենք: Այո, մենք նաև վարչական լծակներ ենք կիրառում, բայց մեր քաղաքական ուժի ծագումնաբանությունը թույլ չի տալիս ամենադաժան դիկտատորական մեթոդները կիրառել»,- ասաց Փաշինյանը:
Վարչապետը նշեց, որ իշխանությունն այսօր արդեն անում է այն, ինչը ինչը մինչ այս չի արել. պահպանում է բոլոր այն կանոնները, որոնք սահմանել է ՀՀ քաղաքացիների համար։
«Երևի այն ժամանակ մտածել ենք՝ ճիշտ կլինի՞ բա, որ վարչապետը, կառավարության անդամները դիմակներով ներկայանան: Հիմա այն կանոնը, որ ձեզ համար ենք սահմանել, սիրելի՛ քաղաքացիներ, խստորեն պահպանում ենք ու նույնը ակնկալում ենք ձեզանից»,- ասաց վարչապետը:
Խոսելով կառավարության վերահսկողական գործառույթից՝ Փաշինյանը նշեց, որ տնտեսական գործունեության սահմանափակումների վերացումից հետո հարյուրավոր ձեռնարկություններ են փակվել, քաղաքացիներ են տուգանվել:
«Այսօր, օրինակ, առավոտյան մի ժամվա ընթացքում 35 տաքսու վարորդ է ենթարկվել պատասխանատվության, տասնյակ տրանսպորտային միջոցներ են ենթարկվել պատասխանատվության: Երեկ գործնականում ամբողջ Կասկադի սրճարաններն ու ռեստորանները փակվեցին»,- ասաց Փաշինյանը՝ հավելելով, որ բոլորը պետք է հասկանան, որ սահմանված կանոնների խախտումն անխուսափելիորեն բերելու է պատասխանատվության:
Վարչական լծակների կիրառմամբ, Փաշինյանի խոսքով, կառավարությունը փորձում է բարձրացնել քաղաքացիների քաղաքացիական գիտակցության մակարդակը:
Հիշեցնենք` Հայաստանում կորոնավիրուսով վարակվածների թիվը վերջին մեկ օրում ավելացել է 289-ով և հասել 7402–ի։
Այս պահին փաստացի բուժում է ստանում 4052 մարդ, կատարվել է 51594 թեստավորում, առողջացել են վարակվածներից 3220–ը։
Ընդհանուր առմամբ գրանցվել է կորոնավիրուսային հիվանդությունից մահանալու 91 դեպք և մահվան 39 անուղղակի դեպք:
Օգոստոսին լրջագույն ճգնաժամը բախելու է մեր դուռը. Մելքումյան