ԵՐԵՎԱՆ, 24 մայիսի — Sputnik. Երևանի քաղաքապետարանը տեղեկացնում է, որ Արաբկիրում պուրակը պատնեշած շուրջ 30 կրպակ է ապամոնտաժվում։
«Այս անգամ ապամոնտաժվում են մոտ երեսուն կրպակներ Կոմիտաս 49/9 հասցեի երբեմնի պուրակը պատնեշած և մայթից ու պողոտայից բաժանած հատվածից։ Տնտեսվարողը ինքն է կատարում դրանց ապամոնտաժումը, քանի որ պայմանագրային ժամկետն ավարտվել է»,–նշված է քաղաքապետարանի Facebook սոցիալական ցանցի պաշտոնական էջում։
Նշվում է նաև, որ պուրակը նորովի է ներկայանալու Արաբկիրին և Երևանին։
Հիշեցնենք, որ այս տարեսկզբին` հունվարին, Երևանի Աջափնյակ վարչական շրջանում մեկնարկել են ապօրինի կրպակների ապամոնտաժման աշխատանքները։ Դրան հաջորդել էր Սուրբ Աննա եկեղեցու դիմացի ծաղկի տաղավարի ու նախկին Փակ շուկայի ճակատային մասի մետաղյա հովանոցների ապամոնտաժման աշխատանքները։