ԵՐԵՎԱՆ, 21 մայիսի – Sputnik․ Հայաստանի քաղաքացիները, որոնց մոտ կորոնավիրուս է հայտնաբերվել Վրաստանում, շփում են ունեցել վարակված անձանց հետ։ Տեղեկությունը Sputnik Արմենիայի թղթակցի հետ զրույցում հայտնեց Վրաստանում ՀՀ դեսպանության հասարակայնության հետ կապերի բաժնի ղեկավար Հարություն Հայրապետյանը։
Ավելի վաղ հայտնել էինք, որ ՀՀ երկու քաղաքացու տեղափոխել են Թբիլիսիի Վախթանգ Բորչոշվիլու անվան հիվանդանոց։
«1992թ․-ին ծնված կնոջ վիճակը միջին ծանրության է, իսկ նրա 1,5 տարեկան դուստրն իրեն լավ է զգում»,-ասաց Հայրապետյանը։
Նա նշեց, որ մայրն ու դուստրը մշտապես բնակվել են Վրաստանի Բորժոմի քաղաքում։ Նրանց հիվանդանոց են տեղափոխել կարանտինային գոտուց։
Մայիսի 21-ի դրությամբ Վրաստանում կորոնավիրուսով վարակվածների թիվը հասել է 721–ի, վերջին մեկ օրում վարակվելու 8 նոր դեպք է գրանցվել։ Հայաստանում վարակվածների թիվը 5606 է։ Երկու երկրներում էլ արտակարգ դրություն է գործում։