ԵՐԵՎԱՆ, 21 մայիսի– Sputnik, Արմենուհի Մխոյան. Թեև ախտահանման աշխատանքերը կատարված են և բոլոր մանկապարտեզները պատրաստ են ընդունել սաներին, սակայն Գյումրիում գործող համայնքապատկան 24 նախադպրոցական ուսումնական հաստատությունից միայն 7-ում են ծնողները ցանկություն հայտնել երեխաներին ուղարկել մանկապարտեզ: Մանկապարտեզների ընդհանուր 2400 սանից միայն 28 երեխա է հիմա հաճախում, իսկ դրանց բացվելու առաջին օրը մանկապարտեզ շտապած փոքրիկների թիվը ընդամենը 18 է եղել:
Sputnik Արմենիայի հետ զրույցի ժամանակ Գյումրու քաղաքապետարանի կրթության բաժնի պետի պաշտոնակատար Շողիկ Ալեքսանյանը սա ծնողների կողմից զգուշավորություն որակեց: «Ունենք մանկապարտեզ, որ միայն 2 երեխա է գրանցվել: Ընդհանուր 28 սան՝ ողջ քաղաքում, բայց այս թիվը նախնական է: Այսօր ավելի ուշ կհստակեցվի, թե նրանցից քանինսն են եկել մանկապարտեզ»,-նշեց պատասխանատուն:
Ստեղծված նոր իրավիճակում երեխաներին մանկապարտեզ տանելը դժվար է թե՛ ծնողների, թե՛ հաստատությունների համար: «Ծնողները պարտավոր են ամեն օր սնունդը տանել, անկողին լվանալ, իսկ երեխան էլ չի կարող նորմալ շփվել մյուս երեխաների հետ ու խաղալ: Այս պարագայում չեմ կարծում, որ պետք է երեխային մանկապարտեզ տանել, հատկապես որ աշխատել կարող եմ հեռավար։ Այ, երբ այդ հնարավորությունից զրկվեմ, խնդիր կլինի»,-նշում է գյումրեցի ծնող Կարինե Գրիգորյանը, որը իր 2 երեխաներին որոշել է էլի մանկապարտեզ չուղարկել:
Հաճախելիության նման ցուցանիշի դեպքում հաստատությունները ևս ֆինանսական դժվարություններ կունենան: «Եթե ծնողը սնունդն ինքն է բերում ու սննդի գումար չի տալիս, միայն կոմունալ ծախսերի համար պետք է վճարի 1500 կամ 2 հազար դրամ, ապա ասենք` 2 սան ունեցող նախադպրոցական հաստատությունը կկարողանա՞ փակել իր ծախսերը»,-ասում է Շողիկ Ալեքսանյանը:
Նշենք, որ օրերս Գյումրու մանկապարտեզների տնօրենների և քաղաքապետարանի կրթության բաժնի պատասխանատուների մասնակցությամբ տեղի ունեցած քննարկման ժամանակ որոշում էր կայացվել, կիրառել ՀՀ պարետի` մանկապարտեզների մասին որոշման այն կետը, համաձայն որի հնարավորության դեպքում երեխաները բերում են սնունդը տնից՝ առանձնացված տարաների մեջ։
Ի՞նչ կանոններ են գործելու մանկապարտեզներում
Հիշեցնենք, երեխային մակապարտեզ ուղարկող ծնողը պարտադիր պետք է հաստատության տնօրինությանը ներկայացնի տեղեկանք աշխատանքի վայրից, այն մասին որ աշխատանքը հեռավար կազմակերպել հնարավոր չէ, մանկապարտեզների աշխատակիցներն էլ պետք է պարտադիր ունենան տեղեկանք, որ կորոնավիրուսով վարակված չեն եղել, կոնտակտավորների հետ չեն շփվել: