ԵՐԵՎԱՆ, 20 մայիսի – Sputnik. Վերին Լարսի անցակետի ռուսական կողմում գտնվող ՀՀ քաղաքացիները հրաժարվել են Հայաստան վերադառնալ երեկ կայացած Սոչի-Երևան թռիչքից։ ԱԳՆ խոսնակ Աննա Նաղդալյանը Sputnik Արմենիային հայտնեց, որ նրանք ցանկանում են Հայաստան վերադառնալ բացառապես անձնական ավտոմեքենաներով:
Նրա խոսքով՝ Վերին Լարսի անցակետում ռուսական կողմից ներկայումս գտնվող ՀՀ քաղաքացիների հետ մշտական կապի մեջ է մաքսային կցորդը։ Նաղդալյանը հիշեցրեց, որ նոր տիպի կորոնավիրուսի տարածման հետևանքով վրացական իշխանությունների կողմից երկրում հայտարարված արտակարգ դրության պայմաններում ռուս-վրացական սահմանը շարունակում է փակ է լինել օտարերկրյա քաղաքացիների համար:
«Հաշվի առնելով վերոնշյալ հանգամանքը՝ Ռոստովում ՀՀ գլխավոր հյուպատոսության կողմից որպես լուծման տարբերակ առաջարկվել էր կազմակերպել ՀՀ քաղաքացիների վերադարձն երեկ կայացած Սոչի-Երևան, ինչպես նաև առաջիկայում կայանալիք թռիչքներով՝ միաժամանակ հոգալով ինչպես կանանց և երեխաների ճանապարհածախսը, այնպես էլ՝ ՀՀ քաղաքացիներին պատկանող ավտոմեքենաները հատուկ հատկացված կայանատեղիներում պահելու հարցերը: Անցակետում գտնվող ՀՀ քաղաքացիները հրաժարվել են լուծման վերոնշյալ, ներկայումս միակ տարբերակից՝ պնդելով կազմակերպել իրենց վերադարձը Հայաստան բացառապես իրենց անձնական օգտագործման մեքենաներով»,-ասաց նա:
Ընդգծենք, որ ՀՀ քաղաքացիներն արդեն տևական ժամանակ է` գտնվում են Վերին Լարսում։ Sputnik Արմենիան ավելի վաղ զրուցել էր նրանցից մի քանիսի հետ։