ԵՐԵՎԱՆ, 20 մայիսի — Sputnik. «Ադեկվադ» միաբանության ղեկավար Արթուր Դանիելյանը ՀՀ ոստիկանության քրեական գլխավոր վարչության ՀԱՄԱԴՊՎ ահաբեկչության և ծայրահեղականության դեմ պայքարի բաժնից դուրս գալուց հետո լրագրողների հետ զրույցում ասաց, որ ոստիկաններն իրենից պահանջում էին ապացուցել, որ ՀՀ վարչապետ Նիկոլ Փաշինյանի մերձավորները որևէ կապ ունեն վերջին շրջանում մեծ աղմուկ բարձրացրած ծխախոտի մաքսանենգության հետ։
Դանիելյանի խոսքով` ոստիկանությունը փոխանակ հարցաքննի գործի մեղավորներին, կանչում է հարցաքննության Facebook-յան այն օգտատերերին, որոնք ֆիքսել են, որ մաքսանենգություն է տեղի ունեցել։
«Այս բոլոր բացահայտումները քաղաքական հետևանք չեն ունեցել։ Ես ակնկալում եմ, որ եթե երկրից կարանտինի օրոք տասնյակ տոննաներով մաքսանենգ ծխախոտ է արտահանվում, ապա առնվազն պետք է մաքսայինի պետի լիազորությունները կասեցվեր կամ նույնիսկ հարկայինի պետի և Տաթևիկ Ռևազյանի, քանի որ չէր կարող Քաղավիացիան այդ մասին չիմանալ։ Որևէ քաղաքական քայլ չի ձեռնարկվել, և չեն էլ փորձում պատժել մեղավորներին։ Ընդամենը փորձում են պրոցեսի պատրանք ստեղծել, որը միտված է իրենց իշխանությունը մաքրել քաղաքական պատասխանատվությունից։ Ըստ էության, պետական մասշտաբի հանցագործության մասին է խոսքը»,-ասաց նա։
Նշենք, որ այսօր «Ադեկվադ» միաբանության անդամներից մոտ 18 անձ բերման է ենթարկվել ոստիկանության աշխատակիցների կողմից։ Մինչ այդ «Ադեկվադ» միաբանության ղեկավար Արթուր Դանիելյանը հրավիրվել էր ՀՀ ոստիկանության քրեական գլխավոր վարչություն ՀԱՄԱԴՊՎ ահաբեկչության և ծայրահեղականության դեմ պայքարի բաժին` բացատրություն տալու։ Քրեական ոստիկանության գլխավոր վարչության մասնաշենքի մուտքի մոտ Դանիելյանի ասուլիսի ժամանակ մարդիկ էին հավաքվել, ինչը արտակարգ դրության կանոնների խախտում է ենթադրում։
ԱԺ-ում հնչող խոսքն ու պահվածքը օրինակ են դառնում նաև հասարակության համար. ՄԻՊ
Հիշեցնենք՝ ռուսաստանյան աղբյուրները ապրիլի 25-ին հայտնեցին, որ ՌԴ ԱԴԾ և մաքսային ծառայության աշխատակիցները Կրասնոդարի օդանավակայանում առգրավել են մաքսանենգ ծխախոտի 2700 տուփ, և տարբեր ապրանքանիշների տուփերի վրա հայկական ակցիզ է եղել:
Ըստ հաղորդագրությունների` ապրանքը Հայաստանից Աֆղանստան էր տարվում՝ Կրասնոդարի և Դուշանբեի կանգառներով։ Ընդ որում` տրանզիտային օդանավը պատկանում է ՀՀ ԱԻ նախարարությանը։
Ավելի ուշ ՀՀ ԱԻՆ–ն արձագանքեց այս հայտարարությանը՝ նշելով, որ արտակարգ իրավիճակների նախարարությունն օդանավ չունի:
Հայաստանյան լրատվամիջոցներն արդեն տևական ժամանակ է` փորձում են պարզել, թե ում է պատկանում մաքսանենգ ուղեբեռը: Տարբեր լրատվամիջոցներում շոշափվել են Նիկոլ Փաշինյանի կնոջ եղբոր՝ պատգամավոր Հրաչյա Հակոբյանի, ՊԵԿ փոխնախագահներ Ռաֆիկ Մաշադյանի ու Շուշանիկ Ներսիսյանի, «Զվարթնոց» օդանավակայանի (արևմտյան մաքսատուն) պետ Տիգրան Զաքարյանի, ինչպես նաև «Արմենիան Տոբակո Քոմփանի» ՍՊԸ սեփականատեր, ՊԵԿ նախկին նախագահ Վարդան Հարությունյանի անունները:
Մայիսի 7 – ին «Արմենիան տոբակո քոմփանի» ընկերությունը հայտարարություն տարածեց, որում հայտնում էր, որ որևէ առնչություն չունի մաքսանենգ եղանակով ՌԴ տարածքում հայտնաբերված ծխախոտային արտադրանքի տեղափոխման հետ, քանի որ իր արտադրանքը վաճառել է միջազգային դիստրիբյուտորական ընկերությանը` նրա հետ սահմանված կարգով կնքելով մատակարարման պայմանագիր։ Սահմանված կարգով կազմվել են բեռը ուղեկցող բոլոր փաստաթղթերը, և արտադրանքը ՀՀ տարածքում հանձնվել է գնորդ կազմակերպությանը և այդ պահից սկսած այդ ապրանքի համար այլևս որևէ պատասխանատվություն չի կրում: