ԵՐԵՎԱՆ, 20 մայիսի - Sputnik. ՀՀ մարդու իրավունքների պաշտպան Արման Թաթոյանն անդրադրարձել է երեկ սոցցանցերում տարածված հայոյախառն գրառումներին, որոնք ուղղված են ՀՀ քաղավիացիայի կոմիտեի նախագահ Տաթևիկ Ռևազյանին և նրա նորածին դստերը:
Կնոջ հանդեպ արտահայտությունները վիրավորական են, բայց ՄԻՊ-ը չի կարող պաշտպանել պաշտոնյային
«Տեսա ինչ-որ մի անձի բացարձակ անընդունելի, հակամարդկային ու հակաիրավական գրառումը։ Այդ գրառումն ամբողջությամբ ատելության խոսք է, ամենախիստ դատապարտելի երևույթն է՝ մարդու, մայր դարձած կնոջ արժանապատվությունը բացարձակ ոտնահարող արտահայտություններով։ Բացարձակ դատապարտելի է առավել ևս նորածին երեխային ուղղված ատելությունը»,- գրել է նա։
Թաթոյանը նշել է, որ նման երևույթները պետք է իսպառ բացառվեն, արմատախիլ արվեն, իսկ այդպիսի անձինք՝ ենթարկվեն պատասխանատվության։ Նա սոցիալական ցանցերի օգտատերերին հորդորել է այդ գրառումը որևէ կերպ չօգտագործել հրապարակումներում՝ ատելության խոսք չտարածելու և նրա անձը առավել չհանրայնացնելու համար։
Մարդու իրավունքների պաշտպանը խոստացել է, որ իր ղեկավարած կառույցը և ինքն անձամբ հետևողական կլինեն, որպեսզի այդպիսիք խստագույնս պատասխանատվության ենթարկվեն:
Հանրային պաշտոն զբաղեցնող անձինք պետք է թույլ չտան վիրավորանքի կամ ատելություն խոսք․ ՄԻՊ
Հիշեցնենք՝ երեկ՝ մայիսի 19-ին, ՀՀ քաղավիացիայի կոմիտեի նախագահ Տաթևիկ Ռևազյանը Facebook-ի իր էջում լուսանկարներ էր հրապարակել և հայտնել, որ լույս աշխարհ է եկել իր դուստրը: Հրապարակմանը հաջորդել էին բազմաթիվ բարեմաղթանքներ ու շնորհավորանքներ, ցավոք, եղան նաև ոչ բարեկիրթ օգտատերեր, որոնք անպարկեշտ գրառումներ են արել:
Ռևազյանն այժմ Դանիայում է, որտեղ ապրում է նրա ընտանիքը։ Նա մեկնել է Դանիա՝ հղիության վերջին ամիսները բարեկամների մոտ անցկացնելու համար։ Ռևազյանը բազմիցս նշել է, որ թերևս Հայաստան կվերադառնա, երբ երեխան մի քանի ամսական լինի։ Նրա վերադարձը նաև չվերթերի վերականգնման հետ է կապված։
Ռևազյանը Քաղաքացիական ավիացիայի կոմիտեն ղեկավարում է 2018 թվականի հուլիսի 10-ից։ Նա երկար ժամանակ ապրել է Դանիայում ու աշխատել ավիացիայի ոլորտում։