ԵՐԵՎԱՆ, 16 մայիսի – Sputnik. ՀՀ վարչապետ Նիկոլ Փաշինյանն այսօր առցանց ասուլիսի ժամանակ հայտնեց, որ հեռավար կրթությունը Հայաստանում կարող է շարունակվել նաև աշնանը:
«Ըստ էության, մենք այս տարի, չնայած դպրոցները ֆիզիկապես փակ են, բայց ուսումնական տարին ավարտին կհասցնենք, երեխաները կավարտեն դասարանները, դպրոցը: Մենք հեռավար կրթության ամբողջական համակարգ կունենանք մինչև աշուն, որովհետև մեծ հավանականություն կա, որ աշնանը ևս կորոնավիրուս ենք ունենալու, որպեսզի ուսումնական գործընթացը չխաթարվի»,- ասաց Փաշինյանը:
Նշենք, որ Փաշինյանն իր այսօրվա ասուլիսը ավանդաբար սկսեց 100 փաստ ներկայացնելով: Դրանցից 18-ը վերաբերում էին կորոնավիրուսի հետևանքների չեզոքացման նպատակով ՀՀ կառավարության իրականացրած հակաճգնաժամային ծրագրերին: Փաշինյանի խոսքով` ընդհանուր առմամբ այդ ծրագրերի վրա արդեն ծախսվել է 84.4 մլրդ դրամ:
Հիշեցնենք` ՀՀ կառավարությունը մայիսի 14–ի իր նիստում որոշեց արտակարգ դրությունը երկարացնել ևս մեկ ամսով։ Այն կտևի մինչև հունիսի 13–ը՝ ժամը 17։00–ը ներառյալ։ Երկարաձգված արտակարգ դրության պայմանները որոշակի փոփոխությունների են ենթարկվել։ Տնտեսական շատ գործունեություններ թույլատրվել են, բայց սահմանվել են պարտադիր պահանջներ։