ԵՐԵՎԱՆ, 15 մայիսի — Sputnik. Երևանի քաղաքապետարանի ենթակայությամբ գործող մանկապարտեզները կվերաբացվեն ոչ թե մայիսի 18–ին, ինչպես նախապես որոշված էր, այլ մայիսի 20-ին։ Տեղեկությունը Facebook–ի իր էջում գրել է Երևանի քաղաքապետի մամուլի խոսնակ Հակոբ Կարապետյանը։
«Հաշվի առնելով մանկապարտեզների տարածքների ախտահանման մեծածավալ աշխատանքները (305.000քմ), ինչպես նաև պարետատան կողմից սահմանված կանոնների պահպանման նպատակով անհրաժեշտ պարագաների գնման ծավալները՝ պարետատան հետ քննարկումների արդյունքում որոշվել է մանկապարտեզների աշխատանքները սկսել մայիսի 20-ից»,–տեղեկացրել է նա:
Քաղաքապետարանից խոստացել են տարվող աշխատանքների մասին լրացուցիչ տեղեկացնել:
Հիշեցնենք, որ կորոնավիրուսի չնվազող տեմպով պայմանավորված ՀՀ կառավարությունը մայիսի 14–ի նիստում որոշում կայացրեց երկարաձգել երկրում արտակարգ դրությունը։ Այն կտևի մինչև հունիսի 13-ը, ժամը 17։00–ը ներառյալ։ Բայց ՀՀ պարետ Տիգրան Ավինյանի որոշմամբ` տնտեսական շատ գործունեություններ թույլատրվում է վերաբացել մայիսի 18–ից։ Մանկապարտեզները դրանց թվում են։ Բայց սահմանված են անվտանգության պահպանման պարտադիր պայմաններ։
Պարետի որոշմամբ Երևանի կենտրոնի խոշոր սուպերմարկետներից մեկը ժամանակավորապես չի գործի