ԵՐԵՎԱՆ, 14 մայիսի — Sputnik. ՀՀ առողջապահության նախարար Արսեն Թորոսյանն ինքնամեկուսացած է: Տեղեկությունը Sputnik Արմենիայի հարցմանն ի պատասխան հաստատեց նախարարի մամուլի քարտուղար Ալինա Նիկողոսյանը:
«Նախարարը կորոնավիրուսի թեստ է հանձնել, բայց պատասխանը դեռ չի ստացվել»,–ասաց Նիկողոսյանը։
Նախարարությունում կան կորոնավիրուսով վարակված աշխատակիցներ, որոնց մոտ հիվանդությունը հաստատվել է: Թորոսյանը մեկուսացվել է որպես նրանց հետ շփում ունեցած անձ:
Նշենք, որ այսօր հայտնի դարձավ, որ Տարածքային կառավարման և ենթակառուցվածքների նախարար Սուրեն Պապիկյանը ևս ինքնամեկուսացած է։ Նա չէր մասնակցում ՀՀ կառավարության հերթական նիստին։ Փոխվարչապետ Տիգրան Ավինյանը տեղեկացրեց, որ նախարարությունում կան կորոնավիրուսի հաստատված դեպքեր, այդ պատճառով Սուրեն Պապիկյանը ինքնամեկուսացել է։
Նշենք, որ Հայաստանում կորոնավիրուսով վարակվածների թիվը վերջին մեկ օրում ավելացել է 142–ով և դարձել 3860։ Այս պահին փաստացի բուժում է ստանում 2218 մարդ, կատարվել է 36016 թեստավորում, արդեն առողջացել են վարակվածներից 1572–ը։ Ընդհանուր առմամբ գրանցվել է կորոնավիրուսային հիվանդությունից մահանալու 49 դեպք և մահվան 21 անուղղակի դեպք:
ՀՀ կառավարությունն այսօրվա նիստում Հայաստանում արտակարգ դրությունը երկարացրեց մինչև հունիսի 13–ը, ժամը 17։00–ն։