ԵՐԵՎԱՆ, 13 մայիսի – Sputnik. Վրացի սահմանապահները փորձել են ազատել Վերին Լարսի անցակետի իրենց հատվածը, որտեղ ՀՀ քաղաքացիներ են եղել (վերջիններս ուզում են հայրենիք վերադառնալ, և տեղաշարժի սահմանափակումների պատճառով արդեն մի քանի օր է՝ նրանք մնացել են մաքսատանը)։
Shamshyan.com–ը հայտնում է, որ անցած գիշեր վրացի սահմանապահները հարձակվել են այդ մարդկանց վրա՝ պահանջելով, որ լքեն տարածքը, իսկ հերթափոխի պետը քիչ է մնացել` մեքենայով վրաերթի ենթարկի Հայաստանի քաղաքացիներից մեկին։
Մենք փորձեցինք մեկնաբանություն ստանալ Թբիլիսիում ՀՀ դեսպանությունից։ Դեսպանատան աշխատակից Հարություն Հայրապետյանը Sputnik Արմենիային հայտնեց, որ Հայաստանի քաղաքացիները մտել են չեզոք գոտի՝ այդպիսով խոչընդոտելով մաքսատան բնականոն աշխատանքը։
Նրա խոսքով՝ ՀՀ քաղաքացիների հանդեպ որևէ բռնություն չի կիրառվել, վրացի մաքսավորները պարզապես պահանջել են, որ նրանք ազատեն ճանապարհը, քանի որ կանգնած են եղել անցակետային գծի մոտ։ Ընդհանուր առմամբ այս պահին մաքսատանը մոտ 15 մարդ կա։
Երեկ նրանց հետ հանդիպել են դեսպանատան աշխատակիցները, ուտելիք և առաջին անհրաժեշտության իրեր են տարել։ Մինչ այդ ՀՀ արտգործնախարարությունը արտասահմանում գտնող բոլոր քաղաքացիներին կոչ էր արել հայրենիք վերադառնալու համար հերթագրվել արտերկրում ՀՀ դիվանագիտական ներկայացուցչություններում, որոնք համակարգում են վերադարձի գործընթացը։