ԵՐԵՎԱՆ, 11 մայիսի –Sputnik. Մերձմոսկովյան Կրասնոգորսկում ծերերի հանգստյան տանը բռնկած հրդեհի հետևանքով մահացել է 9 մարդ և նույնքան մարդ տուժել։ Տեղեկությունը հայտնում է ՌԻԱ Նովոստին։
Դեպքը տեղի է ունեցել կիրակի լույս երկուշաբթի գիշերը։ Նախնական տվյալներով` հրդեհի բռնկման պատճառ կարող էր լինել էլեկտրալարերի անսարքությունը։ Մեկ այլ վարկածով` կրակի հետ անզգույշ վերաբերմունքը։ Դեպքի առթիվ քրեական գործ է հարուցվել։
Նշվում է, որ հանգստյան տունը գրանցված չի եղել։ Ինչպես տեղեկացրել է քաղաքապետ Էլմիրա Խայմուրզինան, քննությունը կպարզի, թե ով է մասնավոր տանը «ծերերի համար հանգստյան տուն» կազմակերպել։
«Ով և ինչ հիմքով է ծերերի հանգստյան տուն ստեղծել` այժմ պարզում են քննչական մարմինները։ Համոզված եմ, որ ողբերգության բոլոր մեղավորները կհայտնաբերվեն և կպատժվեն», – նշել է Խայմուրզինան։
Բոլոր տուժածներին հոգեբանական օգնություն կցուցաբերվի։ Դեպքի վայրում քննիչներ և քրեագետներ են աշխատում։ Հրդեհից տուժածների համար նաև օգնության շտաբ է ստեղծվել։
Հրդեհի հետևանքով 9 մարդու մահվան դեպով քրեական գործ է հարուցվել «անզգուշությամբ երկու և ավելի անձանց մահվան հանգեցրած` անվտանգության պահանջներին չհամապատասխանող աշխատանքի կատարում կամ ծառայությունների մատուցում» հոդվածով։