ԵՐԵՎԱՆ, 9 մայիսի –Sputnik. Հայաստանում ռուսական ռազմակայանի զինծառայողները Հայրենական մեծ պատերազմում տարած հաղթանակի պատվին բեռնատար մեքենաներով Երևանի և Գյումրիի փողոցներում երթ իրականացրին պատերազմական տարիների երգերի ներքո։ Տեղեկությունը հայտնում է ՀՌՕ մամուլի ծառայությունը։
«Երկրի երկու հիմնական քաղաքների գլխավոր փողոցներով անցան «ԿամԱԶ» և «Ուրալ» տեսակի բեռնատար ավտոմեքենաները, որոնցում գտնվում էին Հայրենական մեծ պատերազմի տարիների համազգեստով զինծառայողներ` հրացանները ձեռքերին, Հաղթանակի և Ռուսաստանի դրոշներով։ Տեխնիկայի շարասյուները երթ իրականացրին ռազմական տարիների` «Հաղթանակի օր», «Ահա զինվորներն են գալիս», «Սպասիր ինձ» և այլ երգերի ուղեկցությամբ», – գրված է հաղորդագրության մեջ։
Նշվում է նաև, որ զինծառայողները շնորհավորել են Հաղթանակի հոբելյանի առթիվ, մասնակցել ծաղկեպսակների և ծաղիկների տեղադրմանը` Երևանի և Գյումրիի «Մայր Հայաստան» հուշահամալիրների Անմար կրակի մոտ, պատերազմի տարիներին զոհվածների հուշարձաններին և շիրիմներին։ Հաղթանակի օրվա առիթով Երևանի և Գյումրիի երկնքում ցուցադրական թռիչք է իրականացրել ՀՌՕ մարտական ավիացիան։
Հաղորդագրության մեջ ասվում է, որ Երևանի և Գյումրիի կայազորների զինվորական ավաններում տեղի են ունեցել տոնական զորաշարվածքներ մարտական դրոշների դուրսբերմամբ և ՌԴ ՊՆ–ի ու ռազմական օկրուգի զորքերի հրամանատարի տոնական հրամանների և շնորհավորական հեռագրերի ընթերցմամբ։ Աչքի ընկած զինծառայողներին պետական և գերատեսչական պարգևներ, արժեքավոր նվերներ և պատվոգրեր են շնորհվել։
«Զինվորական խոհարարները զինծառայողներին տոնական ճաշին ազգային ուտեստներ են մատուցել, ճաշացանկը բազմազան դարձրել վիտամինացված աղցաններով, մրգերով, շոկոլադով և հրուշակեղենով», – հայտարարել են մամուլի ծառայությունում։
Մեր կոփված բարեկամությունը կշարունակվի. Պուտինն ու Միշուստինը շնորհավորել են Փաշինյանին
Նշվում է, որ Հայաստանում նոր կորոնավիրուսային վարակի տարածման պայմաններում, բոլոր միջոցառումներն անցկացվում են զինծառայողների նվազագույն ներգրավմամբ։ Տոնական զորաշարվաքծներն ու միջոցառումները կազմակերպվել են սանիտարահամաճարակաբանական բոլոր միջոցների և պահանջների պահպանմամբ։