ԵՐԵՎԱՆ, 9 մայիսի – Sputnik. Երևանում այսօր ավիացիոն տոնական զորահանդես էր։ Այն նվիրված էր մայիսի 9-ին Հայրենական մեծ պատերազմում տարած հաղթանակի 75-ամյակին։
Ռուսական ռազմակայանի և ՀՀ ՊՆ-ի ավիացիոն միավորումների օդաչուները տոնական թռիչքներ իրականացրին, որոնց մասնակցում էին 4 ՄիԳ-29 կործանիչները, որոնց հետևից ընթանում էին Սու-30ՍՄ և Սու-25 գրոհիչ ինքնաթիռները։ Տոնական թռիչքն ավարտեց Մի-8ՄՏՎ ռազմատրանսպորտային և Մի-24Պ հարվածային ուղղաթիռների խումբը։
Նշենք, որ այսօր առավոտյան Երևանի «Հաղթանակ» զբոսայգում տեղի ունեցավ հանդիսավոր արարողությունը, որի ընթացքում ՀՀ ղեկավարությունը հարգանքի տուրք մատուցեց Հայրենական մեծ պատերազմի զոհերի հիշատակին։
ՀՀ նախագահ Արմեն Սարգսյանը, ԱԺ փոխխոսնակ Ալեն Սիմոնյանը, փոխվարչապետ Տիգրան Ավինյանը և այլ բարձրաստիճան այրեր ծաղիկներ դրեցին Անմար կրակի մոտ` գլուխ խոնարհելով Հայրենական մեծ պատերազմի և Ղարաբաղյան հերոսամարտի տարիներին զոհվածների հիշատակի առաջ։ Ամենայն հայոց կաթողիկոս Գարեգին Բ–ն աղոթք հնչեցրեց ռազմաճակատից չվերադարձած հայ ժողովրդի զավակների համար։
Նշենք, որ կորոնավիրուսի համավարակի պատճառով «Հաղթանակ» զբոսայգու մուտքը փակ է։ Այնուամենայնիվ, Հայաստանում, ինչպես նաև այլ երկրներում, հիշատակի միջոցառումներ և ակցիաներ են անցկացվում։