ԵՐԵՎԱՆ, 5 մայիսի– Sputnik. «Նորք» ինֆեկցիոն հիվանդանոցի բժիշկները պարգևատրվել են արծաթե պատվոգրերով։ Տեղեկությունը հայտնել են հիվանդանոցի ֆեյսբուքյան էջում։ Հրապարակված լուսանկարում երևում են բուժաշխատողները, որոնցից յուրաքանչյուրի ձեռքին պատվոգիր կա։
Բժիշկ լինելը հեշտ չէ. այս օրերին ինչեր են զոհում նրանք հանուն մեզ. զրույց բժիշկների հետ
«Երբ բժշկի աշխատանքը գնահատվում է անշահախնդրորեն: Քաղաքացի Հովհաննես Հունանյանի և իր ընկերների նախաձեռնությունն է:Նրանք մեր մասնագետների համար պատրաստել էին արծաթե պատվոգրեր, որոնք հանձնվեցին հենց իր կողմից»,-հայտնում է հիվանդանոցի պաշտոնական էջը։
Հիշեցնենք` Հայաստանում «ՆՈՐՔ» ինֆեկցիոն հիվանդանոցն առաջիններից էր, որտեղ սկսեցին բուժել կորոնավիրուսով հիվանդներին։
Հայաստանում այժմ 9 բժշկական հաստատություններ զբաղվում են միայն կորոնավիրուսով հիվանդների բուժմամբ։ Դրանք են` «Նորք» ինֆեկցիոն հիվանդանոցը, Օրթոպեդիայի ինստիտուտը, ոստիկանության հոսպիտալը, «Սուրբ Աստվածամայր» բժշկական կենտրոնի ծննդատան մասնաշենքը, Արտաշատի բժշկական կենտրոնը, Գյումրու և Վանաձորի ինֆեկցիոն հիվանդանոցները, Կապանի բժշկական կենտրոնի առանձին մասնաշենքը։
Նշենք, որ մայիսի 5–ի տվյալներով` Հայաստանում կորոնավիրուսով վարակվածների թիվը վերջին մեկ օրում ավելացել է 112-ով և դարձել 2619։
Այս պահին փաստացի բուժում է ստանում 1462 մարդ, ընդհանուր առմամբ կատարվել է 25846 թեստավորում, արդեն առողջացել են 1111–ը։ Ընդհանուր առմամբ, գրանցվել է կորոնավիրուսային հիվանդությունից մահանալու 40 դեպք և մահվան 6 անուղղակի դեպք:
Հիշեցնենք` կորոնավիրուսի տարածումը կանխելու համար Հայաստանում մարտի 16-ից ապրիլի 14–ն արտակարգ դրություն էր սահմանվել, որը ՀՀ փոխվարչապետ, պարետ Տիգրան Ավինյանն առաջարկեց երկարաձգել 30 օրով։
Կառավարությունն ապրիլի 13–ի արտահերթ նիստում ընդունեց համապատասխան որոշում, համաձայն որի` արտակարգ դրության ռեժիմը Հայաստանում կգործի մինչև 2020 թվականի մայիսի 14-ը՝ ժամը 17:00-ը ներառյալ։
Մայիսի 1-ին հայտարարվեց, որ մայիսի 4-ից կհանվեն քաղաքացիների տեղաշարժին ու տնտեսական գործունեությանը վերաբերող մի շարք սահմանափակումներ, չի լինի նաև տեղաշարժման թերթիկի անհրաժեշտություն
Քանի՞ բժիշկ է վարակվել կորոնավիրուսով. նախարարը թվեր է հրապարակել