Քաղտեխնոլոգ Կարեն Քոչարյանի դիտարկմամբ` իրավիճակը կշարունակվի այնպես, ինչպես կարանտինից առաջ էր, այսինքն` ով աշխույժ էր ավելի կաշխուժանա, ով զգույշ էր՝ կշարունակի զգույշ մնալ, որովհետև հասարակությունը միասեռ զանգված չէ։
«Ավելի հասուն հատվածը բնականաբար կշարունակի ավելի զգույշ լինել, իսկ նրանք, ովքեր անգամ խիստ կարանտինի օրերին փողոցներում էին, կշարունակեն ավելի աշխույժ վարքագիծ դրսևորել։ Ես չեմ կարծում, որ առհասարակ համավարակի վտանգն անցել է, սակայն լոկալ պայքարը պետք է տարվեր հենց առաջին օրվանից` սկսած Էջմիածնի ու Չարենցավանի դեպքերից, ավելի շուտ այն պահից սկսած՝ երբ գիտեին, որ Իտալիայից ժամանելու էր դեռ առաջին ինքնաթիռը։ Շատ երկրներում հենց այդպես էլ արել են, օրինակ, հարևան Վրաստանում»,– Sputnik Արմենիայի հետ զրույցում ասաց քաղտեխնոլոգը։
Քոչարյանի կարծիքով` առնվազն որոշ ժամանակ կպահպանվի իրավիճակի իներտությունը, որովհետև մարդկանց մեջ, միևնույն է, կա վախի զգացում։ Բայց խնդիրն, ըստ Քոչարյանի, այն է, որ պետք է հասկանալ, թե ինչ է կատարվում տնտեսության տեսանկյունից։
«Դեռ պարզ չէ, թե քանի մանր ու միջին ձեռնարկություններ կփակվեն, որքան կրճատումներ կլինեն, կամ արդյոք փոքր ձեռնարկությունները կկարողանան դիմակայել այս ամենին։ Հիմա խնդիրն ավելի շատ առնչվելու է ոչ թե առողջապահությանը, այլ դիտարկվելու է խնդրի սոցիալ–տնտեսական կողմը։ Կարծում եմ, որ այս առումով լինելու է շատ ավելի ծանր»,– կանխատեսում է Քոչարյանը։
Ինքնամեկուսացվածներն ավելի խիստ կհսկվեն. Ավինյանը հայտնել է, թե ինչ են մտադիր անել
Այդուհանդերձ թեև շատերի մոտ պահպանվում է վախի զգացումը, սակայն Քոչարյանը զանգվածների շրջանում խուճապային տրամադրություններ չի արձանագրել։ Քաղտեխնոլոգի գնահատմամբ` կան և՛ անհոգ մարդիկ, և՛ զգուշավոր քաղաքացիներ․ թե՛ մեկի, թե՛ մյուսի դեպքում զանգվածները բավականին մեծ են։
Հիշեցնենք, որ պարետ, փոխվարչապետ Տիգրան Ավինյանը Facebook-ի իր էջում գրառում է կատարել` ներկայացնելով արտակարգ դրության ընթացքում կիրառվող սահմանափակումների նոր փոփոխությունները։
Մեկ տարի փակված մնալ հնարավոր չէ. Փաշինյանը, պարետն ու նախարարը՝ հետագա քայլերի մասին