ԵՐԵՎԱՆ, 4 մայիսի–Sputnik. Արևելյան Անգլիայի համալսարանի ու Եղիսաբեթ II—ի հիմնադրամի մասնագետները կատարած ուսումնասիրությունների արդյունքում պարզել են, որ կորոնավիրուսից մահվան դեպքերն ու վիտամին D-ի ցածր մակարդակը փոխկապակցված են. COVID-19-ի հանդեպ առավել խոցելի են այն մարդիկ, որոնք այդ վիտամինի պակաս ունեն։
Գիտնականենրը, որոնց նախնական հետազոտությունները հրապարակվել են Research Square կայքում, համադրել են վիտամին D-ի միջին մակարդակները եվրոպական 20 երկրների քաղաքացիների մոտ COVID-19-ով հիվանդանալու ու մահանալու մասին տվյալների հետ։
«Մենք զգալի կապ ենք հայտնաբերել վիտամին D-ի պակասի ու COVID-19-ով հիվանդանալու դեպքերի միջև, հատկապես՝ մահացության դեպքերի։ COVID-19-ի հանդեպ առավել խոցելի է բնակչության այն խումբը, որը վիտամին D-ի պակաս ունի»,- նշված է հետազոտության մեջ։
Ուսումնասիրության հեղինակները նշել են, որ տարեց մարդկանց շրջանում վիտամին D-ի պակաս է նկատվում հատկապես Իսպանիայում, Իտալիայում ու Շվեյցարիայում։
«Այս երկրներում COVID-19-ով վարակվածության դեպքերը շատ են, տարեց մարդիկ SARS-CoV-2-ով հիվանդանալու ու մահանալու ռիսկային խմբում են»,- ավելացրել են նրանք։
Գիտնականների կարծիքով՝ SARS-CoV-2-ից պաշտպանվելու համար անհրաժեշտ է վիտամին D-ով հավելումներ ընդունել։
Գիտնականները կորոնավիրուսի դեմ նոր դեղամիջոց են հայտնաբերել
Առողջապահության համաշխարհային կազմակերպությունը (ԱՀԿ) մարտի 11-ին նոր COVID-19 կորոնավիրուսի բռնկումը հայտարարել է համավարակ: Կազմակերպությունը բոլոր պետություններին կոչ է արել միավորվել վարակի դեմ պայքարում։