ԵՐԵՎԱՆ, 3 մայիսի – Sputnik. Հայաստանում մինչ օրս արձանագրված կորոնավիրուսային հիվանդության 2386 դեպքից 320-ը կամ 13.4%-ն արձանագրվել են բուժաշխատողների մոտ։ Այս մասին Facebook-ի իր գրառման մեջ հայտնել է առողջապահության նախարար Արսեն Թորոսյանը՝ նշելով, որ դա, թեև շատ ցավալի, բայց և անխուսափելի է։
«Հավանաբար կարող եք պատկերացնել, թե ինչ դժվար է առողջապահական համակարգի համար, երբ պետք է բուժես կամ մեկուսացնես այն մարդուն, որը պետք է բուժի կորոնավիրուսային հիվանդությամբ պացիենտներին։ Հաշվի առնելով հիվանդության բավականին երկար տևողությունը բուժաշխատողները շատ երկար ժամանակ չեն կարողանում աշխատել»,- գրում է նա:
Բարեբախտաբար, կորոնավիրուսից մահվան դեպքեր բուժաշխատողների շրջանում չեն արձանագրվել: Թորսայանի համոզմամբ՝ ցավալի դեպքերից հնարավոր է եղել խուսափել, քանի որ առողջապահության նախարարության ցուցումով 60 տարեկանից բարձր տարիքով և քրոնիկ հիվանդություններով բուժաշխատողներն այդ օրերին չեն աշխատել:
Կորոնավիրուսի իրական թվերը թաքցնելով` իրավիճակը չի շտկվի. պատգամավորի կոչն Ադրբեջանին
«Սա իհարկե կրկին բարդացնում է իրավիճակը, քանի որ բազմաթիվ բուժաշխատողներ չեն կարողանում օգնել իրենց առավել երիտասարդ ու առողջ գործընկերներին պայքարել պացիենտների կյանքի համար՝ ավելի մեծացնելով վերջիններիս ծանրաբեռնվածությունը և վտանգը, որի մեջ նրանք աշխատում են»,- նշում է նախարարը:
Հիշեցնենք՝ վերջին տվյալներով կորոնավիրուսով վարակվածների թիվը Հայաստանում վերջին 1 օրում ավելացել է 113-ով և դարձել 2386։ Այս պահին փաստացի բուժում է ստանում 1312 մարդ, ընդհանուր առմամբ կատարվել է 24177 թեստավորում, արդեն բուժվել է 1035 պացիենտ։ Ընդհանուր առմամբ գրանցվել է կորոնավիրուսային հիվանդությունից մահանալու 35 դեպք և մահվան 4 անուղղակի դեպք: