«COVID-19. տարածաշրջանային իրավիճակ. դիմակայում և հնարավոր զարգացումներ» թեմայով քննարկմանը մասնակցել են նաև Վրաստանում և Իրանում ՀՀ դեսպաններ Ռուբեն Սադոյանն ու Արտաշես Թումանյանը, փորձագետներ ու դիվանագետներ։
Տաթևիկ Հայրապետյանի փոխանցմամբ` կարևոր էր հասկանալ, թե ընդհանուր առմամբ ինչ իրավիճակ է մեր տարածաշրջանում, ինչ է արվել քաղաքացիների տեղափոխման ուղղությամբ, և ինչպիսի դրություն է մասնավորապես Թուրքիայում և Ադրբեջանում։ Ըստ նրա` դիտարկումները բավականին հետաքրքիր էին, որոնց վերաբերյալ փորձագետները ներկայացրել են իրենց տեսակետները։
«Քննարկման թեմա էր դարձել օրինակ այն հանգամանքը, որ Ադրբեջանում և Նախիջևանում թաքցնում են կորոնավիրուսի հետ կապված իրական թվերը, իսկ Թուրքիայում փորձում են ստեղծել համավարակից զերծ տարածքներ։ Քննարկվեց նաև այն հարցը, թե համավարակով պայմանավորված գործընթացներն ինչ ազդեցություն են թողնում տարբեր երկրների ներքաղաքական իրավիճակի վրա և ինչ հետևանքներ կարող են հետագայում ունենալ ընդհանուր տարածաշրջանի առումով»,– տեղեկացրեց պատգամավորը։
Հայրապետյանի համոզմամբ` նման քննարկումները շարունակական կդառնան, որովհետև դրանք անհրաժեշտ են նաև մեր հետագա քաղաքականության մշակման և տարբեր հանգամանքներ հաշվի առնելու տեսանկյունից։
«Հայաստանի ու այն երկրների միջև, որոնց հետ ունենք բարիդրացիական հարաբերություններ ու բաց սահմաններ, կարգավորումները շատ կարևոր են նաև բեռնափոխադրումների, քաղաքացիների տեղափոխման առումով, և բնական է, որ այստեղ համալիր, համաձայնեցված գործողությունները շատ արդյունավետ են և օգտակար նախևառաջ քաղաքացիների տեսանկյունից»,– նշեց պատգամավորը։
Նրա կարծիքով` կարող են քննարկվել տարբեր մեթոդներ, թե որտեղ է պայքարն ավելի արդյունավետ, և այդ առումով վկայակոչվում է Վրաստանի օրինակը, որտեղ հիվանդացության դեպքերը համեմատաբար քիչ են։ Ըստ Հայրապետյանի` այս գործում պետք է հաշվի առնել պետությունների սպեցիֆիկան։ Անդրադառնալով այն հանգամանքին, որ որոշ երկրներ թաքցնում են կորոնավիրուսի հետ կապված իրական թվերը` պատգամավորը շեշտեց` դա անիմաստ է, որովհետև դրանով իրավիճակ չի փոխվում։
«Օրինակ` զբոսաշրջության առումով իրադրությունն ավելի քան ակնհայտ է. երկրները փակ են, չվերթեր չկան, իրավիճակն ամբողջ աշխարհում է կանգնել, հետևաբար թվերը թաքցնելով խնդիր չի լուծվում։ Ընդհակառակը` հետո ինչ–որ պահից սկսած` ստիպված կլինեն ավելի մեծ թվաքանակներով տվյալներ ներկայացնել, հետևաբար ավելի ճիշտ է հասարակության առջև հաշվետվողական, բաց ու թափանցիկ լինել, որպեսզի մարդիկ էլ իրենց հերթին առկա ռիսկերը ճիշտ գնահատեն և ըստ այդմ կազմակերպեն իրենց կենսագործունեությունը»,– ասաց նա։
Հայրապետյանի գնահատմամբ` դեսպանատներն ու հյուպատոսությունները կատարել են հսկայածավալ աշխատանք, որպեսզի մեր քաղաքացիներին վերադարձնեն Հայաստան, իսկ եթե կան որոշակի խնդիրներ, ապա դրանք շտկվում են, ավելին` Հայաստանը նույնպես նպաստում է այլ երկրների քաղաքացիների վերադարձին, և այդ առումով համագործակցությունն իսկապես շատ կարևոր է։