ԵՐԵՎԱՆ, 29 ապրիլի – Sputnik. Ազգային ժողովն այսօր 87 կողմ, 16 դեմ, 16 ձեռնպահ ձայներով ընդունեց կառավարության առաջարկած «Արտակարգ դրության իրավական ռեժիմի մասին» օրենքում փոփոխություններ և լրացումներ կատարելու կից ներկայացված օրինագծերի փաթեթը:
Դրանով հստակեցվում են արտակարգ դրություն հայտարարելու դեպքում ՀՀ պարետի գործառույթները:
Նախ` նշվում է, որ պարետ կարող է լինել ՀՀ վարչապետը կամ փոխվարչապետը, իսկ պարետի ընդունած ակտերն իրավական առումով հավասարեցվում են վարչապետի կամ փոխվարչապետի ընդունած որոշումներին:
Օրենքում հստակեցվել է կոնկրետ համաճարակի տարածման վտանգի կանխման համար անձի ազատության իրավունքը սահմանափակելու կարգը, որը գործող օրենքով սահմանված չէր: Իսկ նման իրավունք վերապահվել է համաճարակի կանխման գործընթացում ներգրավված պետական մարմիններին՝ գրավոր հանձնարարության առկայության դեպքում: Ընդ որում, անհնարինության դեպքում հանձնարարությունը կարող է տրվել բանավոր՝ պայմանով, որ մեկ աշխատանքային օրվա ընթացքում այն կձևակերպվի գրավոր:
Կորոնավիրուսի հետևանքով որոշ փոփոխություններ են արվել նաև ՀՀ Աշխատանքային օրենսգրքում: Այս նախագիծը խորհրդարանն այսօր ընդունեց 117 կողմ, 2 դեմ ձայներով:
Պետական բյուջեում փոփոխություն արվեց. կորոնավիրուսի վնասը գնահատվեց 300 միլիարդից ավելի
Նոր օրենքում սահմանվել է հեռավար աշխատանք հասկացությունը և սահմանվել, որ այդ պարագայում գործատուն աշխատողին կարող է աշխատավարձը վճարել ամբողջությամբ: Իսկ, օրինակ, պարտադիր պարապուրդի դեպքում կարող է և չվճարել:
Պարետը մեղմել է որոշ սահմանափակումներ
Բայց աշխատողին էլ իրավունք է տրվել ֆորս մաժորի իրավիճակում գործատուից պահանջել իրեն տրամադրել չօգտագործված վճարովի արձակուրդը:
Հիշեցնենք, որ ապրիլի 23–ի նիստում ՀՀ կառավարությունը որոշեց փոփոխություններ կատարել «Արտակարգ դրության իրավական ռեժիմի մասին» 2012 թվականին ընդունված օրենքում։